مراجعة حول Realme C11 – أرخص موبايل من ريلمي في مصر !
التصميم :-
ودي أول حاجة مُمكن تشدك ناحية الموبايل ده .. على قد ما التصميم بسيط إلا إنه مُلفت وجديد .. ومحدش خالص هيتوقع إن ده موبايل اقتصادي من التصميم بتاعه.
وكعادة الفئة الإقتصادية .. التصميم بالكامل من البلاستيك .. مع نقشة على الظهر علشان تحمي شوية الموبايل إنه ميتخربش .. لأن للأسف ريلمي مش حاطه جراب في علبة الموبايل.
الكاميرا الخلفية موجودة في مربع ومش بارزة جامد عن الظهر .. وبكدا ده أول موبايل إقتصادي من ريلمي يجي بشكل نافذة كاميرات مختلفة ومميزة.
الشاشة :-
شاشة بتيجي بحجم 6.5 بوصة من نوع IPS LCD وبدقة HD+ .. والسيلفي محطوط في نوتش الشاشة.
وهختصر عليك وقتك .. ديه نفسه شاشة موبايل*Realme C3*.. ومعتقدش حد إشتكى منها .. وكويس إن ريلمي إستخدمت نفس شاشة الـC3 الأغلى وحطيتها في الـC11.
مُجملا ألوان شاشة C11 كويسة .. زوايا الرؤيا كويسة .. السطوع كويس ومعقول تحت الشمس مفيش فيه مشاكل.
الأداء :-
وهنا هنقف مع بعض شوية .. ويا ريت تركز في كلامي .. الـRealme C11 جاي بمعالج ميدياتك Helio P35 بمعمارية 12 نانو .. معالج جديد ولكن هو مبني على الـP22 .. يعني أداءه مايل أكتر للإقتصاديه وده واضح من نتيجة أختبار Antutu.
ولكن مُجمل أداء الـC11 مش وحش ومش بطال .. أحسن شوية من الـRedmi 9A*اللي لسه مجربه .. وأقل شوية عن الـRealme C3 والـRedmi 9.
البطارية :-
بطارية ضخمة .. بتيجي بحجم 5000 مللي أمبير .. ريلمي دايمًا بتحب تحط بطاريات ضخمة .. والبطارية بتوصل لأكتر من 10 ساعات إستخدام فعلي للشاشة .. والموبايل هيكمل يوم ونص او يومين معاك من غير شحن .. حلو جدًا.
الكاميرات :-
الكاميرا الخلفية مزدوجة الرئيسية 13 ميجا بيكسل فتحة عدسة F/2.2 والتانية 2 ميجا بيكسل للعزل .. والسيلفي 5 ميجا بيكسل فتحة عدسة F/2.4.
سوفت وير الكاميرا بتاع ريلمي هنا متضاف فيه Night Mode مع إنه مكانش موجود في الـC3 .. فا دي حاجة كويسة .. والـChroma Boost اللي بيعزز الألوان موجود برده في سوفت وير الكاميرا هنا.
سعر الموبايل :-
الموبايل بيجي في السوق المصري بنسختين .. أسعارهم كالتالي :-
النسخة الـ32 جيجا مع 2 جيجا رام بسعر 1990 جنية مصري
النسخة الـ32 جيجا مع 3 جيجا رام بسعر 2290 جنية مصري
والنسخة دي عليها خصم 100 جنية على موقع سوق دوت كوم وسعرها 2190 جنية بس !
ارجو ان تعم الافادة على الجميع وتقبلو مرورى ..........