اعرفكم بنفسى اولا انا واحد من الناس القديمة فى المنتدى و الحقيقة أنى غايب عن المنتدى من فترة بس حبيت اشارككم بعض الخبرات و التجارب بشكل عام لعل حد يستفيد ... انا مش رابط حساب المنتدى دا بحسابات تداول و مبعملش ردود و مش محتاج فلوس من المسابقة و لا اى حاجة فانا بكتب فقط لوجه الله و للمساعدة
رغم أننا كلنا بنرفض المقامرة "نظريا" و لازم نشتغل بإدارة رأس مال و ما إلى ذلك بس فى واقع بيقول ان أغلب المتداولين سواء فى المنتدى او عامة بيحبوا يغامروا و بيدخلوا بأعلى لوت خلينا مثلا نتكلم على رافعة ١:١٠٠ الى اغلب حسابات المنتدى ١:١٠٠ معادا الناس القديمة هتلاقوا رافعاتهم ١:١٠٠٠ "و انا كنت منهم"
فهقول شوية نصائح كده و هقول برضو ازاى تقدر تحسب اكبر رقم تقدر تدخل بيه على رصيدك على رافعة ١:١٠٠ من غير ما تقعد تجرب على الأزواج المشهورة بس فى موضوع تانى لو الناس عايزه الحسبة انزلهالكم .
لو هنتكلم على النصائح فهبدأها اولا متبقاش مدمن متدخلش ووخلاص عايز تقامر قامر بس متدخلش و خلاص و متشوفش تحليلات اى كلام على اليوتيوب او التليجرام ... يستحسن تحذف تليجرام اصلا لان اغلب الى عليه بيعكوا ... مشوفتش حد عربى كويس للاسف على اليوتيوب الا اتنين بس تقريبا و للاسف الاتنين بيستغلوا الناس عشان تشارك فى وكلاتهم أو شركاتهم أو كورساتهم ... فيفضل تحلل بنفسك و متمشيش ورا حد !
معندكش وقت لتعلم التحليل أو بتتضايق و بتمل مش هقولك اى حاجة غير اتعلم التحليل الكلاسيكى بس اعرف الدعوم و المقاومات و الترندات و الدايفرجنس و الحاجات البسيطة بس ... لو كتبت على اليوتيوب هتلاقيهم فى فيديو ١٠ دقائق بالكتير شوفه و أفهمه و افتح الشارت و أبدأ ..
ثانيا : لو نويت تغامر اوعى تغامر على اى فريم غير اليومى أو الاربع ساعات على أقصى تقدير عشان انا عارف الى بيحصل و لما بيعكس عليك الزوج انت مبيهونش عليك تقفل الصفقة ... ف على الاقل لو هتسيبها مفتوحة سيبها و انت محلل على اليومى عشان فرص نجاتك تبقى اكبر
ثالثا : ادخل على زوج واحد بس متشتتش نفسك تابع حركته و ادرسه كويس و ادخل عليه
بس لما تيجى تدخل عليه ما تتدخلش بصفقة واحدة ادخل باتنين أو تلاتة بمعنى ايه ؟ لو نويت تدخل بصفقة حجمها واحد دولار .. ادخل صفقتين مثلا واحدة ب ٦٠ سنت و التانية ٤٠ سنت مثلا ... خلى دايما واحدة حجمها أكبر من التانية ... و قسم لوتك على صفقتين أو تلاتة ...
ليه ؟ عشان لقدر الله لما يعكس دا هيزود من فرصتك فى النجاة بأن الصفقة الأكبر هتتقفل الاول لوحدها و التانية هتطول شوية + الخسارة الى قفلت عليها الاولى هتتخصم من البونص يعنى مثلا لو جايلك بونص ١٠٠$ و فاتح صفقتين فول مارجن و واحدة منهم قفلت على خسارة ٦٠$ مثلا هيبقى كأن عندك ٤٠ دولار بونص و تقدر تسحب الى فوق اربعين دولار ..." الناس القديمة و إلى فاهمة الميكانزم بتاع انستا .. هيفهم كلامى كويس"
ثالثا و الاهم : اسحب فلوسك مباشرة بعد كل صفقة ... كسبت ٤٠$ كسبت ١٠٠$ اسحب فلوسك مباشرة اعتبرها فرصة لالتقاط الأنفاس و انستا هتبعتلك السحب بسرعة لانك عملت صفقة واحدة فمش هيتعبوا فى المراجعة و ممكن تلاقيها جاتلك فى نفس اليوم .
رابعا : اصبر على المكسب زى منتا بتصير على الخسارة مش قادر تتحكم فى نفسك و عايز تحافظ على المكسب اقفل بعد نص الهدف .. يعنى لو حاطط هدفك ١٠٠ نقطة و لقيته جايب ٥٥ نقطة اقفل عادى و اسحب بس متقفلش قبل نص هدفك مهما حصل .. خليك واثق من نفسك .
و لو خايف اوى حط استوب على الدخول و كمل .. خايف اكتر اقفل نص عقودك و كمل . بس اهم حاجة خليك واثق من نفسك لان ثقتك فى نفسك سر نجاحك بعد كده فى صفقات تانية .
خامسا : متبقاش عنيد متصرش على الشراء أو البيع ساعات السوق بيبقى مش واضح و لا يصلح للتداول و انت عايز تدخل فول مارجن اقفل المنصة أو احذفها و فكك متجريش ورا السعر .. و افتكر دائما أن خروجك لو كان صح .. هتعرف تدخل صح بعد كده .
سادسا : لو نويت تدخل فول مارجن يفضل تظخل من منصة اللاب مش الموبايل ... ليه ؟ لان الموبايل هيجنك .. و هتتهبل قدام الشارت و هتقعد كل شوية تبص عليه ... ادخل صفقتك من اللاب أو الكمبيوتر و سيبها و يستحسن أهدافك تبقى فى حدود ٦٠ الى ١٠٠ نقطة مش اكتر أو اقل .. الا لو هتشتغل سكالبينج خليها ٢٠ نقطة و على فريم كبير .
اخيرا لا يسعنى الا شكركم و تمنياتى لكم بالتوفيق ... لو عايزين الحسبة بتاعت اللوت و حجم الصفقات قولوا فى الردود
بالتوفيق .