كان ياما كان (حوار علمي بين داو جونز واليوت )

[محمد السيد]

يحكى ان جدنا داوجونز ، وعمنا اليوت نيلسون قاما من قبريهما و ودار بينهما هذا الحوار
داو : ايه يابن اخويا اليوت انا سمعت من الناس ان انت بتقول علي كلام مش كويس وان مش
عجبك نظريتي .. ليه كده ؟؟ هو انا قلت حاجة غلط ؟؟
اليوت يستنكر : انا .. والله ما حصل ياعم داو .. بالعكس دا انا مؤيدك تمام في نظريتك .. لكن
انا قلت بس انها مش كاملة ، ومابتردش على بعض النقاط الجوهرية اللي بتلزم اي تاجر
وما بتفسرش بعض الحاجات كده زي الفرق بين الكسر الحقيقي والكسر الوهمي ، وان
ليه الخبر على العملة بييجي كويس ومع ذلك سعرها بينزل أو العكس .. وحاجات كتير
بالشكل ده ..
داو : لا بس انا برده زعلان منك انت راجل فركساوي مفروض ما كنتش تغلط في فركساوي
زيك ..
اليوت : وانا مايرضنيش زعلك ياكبير .. بس برده ما احبش انك تظلمني ، وانا هجيب واد من
الجيل اللي عايش الوقت واشهدوا علينا وخليه هو اللي يحكم بينا
داو : واد من الجيل ده .. واد مين ؟؟؟

---------- Post added at 02:54 AM ---------- Previous post was at 02:45 AM ----------

اليوت : دا واد اسمه محمد السيد احد اعضاء منتدى فوركس مصر وهو اصلا مصراوي ..
.. ماشي ياعم ؟؟
داو : ماشي .. مادام مصراوي .. العيال المصاروة دول .. عيال مخها نضيف وبتفهم وصرحه ،
وهيقول كلمة الحق ..
اليوت : يا محمد ياسيد ..
محمد السيد : ايوة ياعم اليوت اويو ياجدو داو .. انا سامعكم ومارضيتش اتدخل في الكلام قبل
ما تندهولي احتراما لكلام الكبار لاني متربي كويس .. اؤمروني ..
اليوت : انا عاوزك تحكم بيني وبين جدك داو .. وتقول الحق .. انا غلطت فيه ؟؟
محمد السيد : حق الله لا .. هو كل اللي عمله انه حدد الكلام العايم اللي انت قلته في نظريتك
ياكبير ما تزعلش مني ..
داو : ازاي بقه يا ناصح !!!
محمد السيد : ايوة .. انت قلت ان الاتجاه صديقك ولازم تلتزم الاتجاه العام .. صح ؟؟
داو : وايه اللي مش عاجبك في الكلام ده يا اذكى اخواتك ؟؟!!


---------- Post added at 02:58 AM ---------- Previous post was at 02:54 AM ----------

محمد السيد : لا .. الكلام ده على العين والراس ياكبير .. بس انت ما تزعلش مني ما حددتش
الاتجاه العام ..
داو : ياسلام .. هي دي شغلانة .. انت بنظرة عين كده على اي شارت تعرف الاتجاه العام أنهوه
وتعرف التصحيح أنهوه
محمد السيد : ايوة بس عم اوليوت أعطى لنا علامة مهمة نعرفه بيها من غير ما نبص على
الشارت قال انك لو وجدت السعر بيمشي في موجات طويلة و سرحة تعرف انك مع الاتجاه
وانك لو وجدته بيمشي في موجات مزنقة وداخلة في بعضيها والسعر مش عارف يحرز
تقدم يبقي السعر بيصحح ..
داو : يعني جبت التايهة انت وهو ؟؟!! هههه .. ايه تاني ياناصح ؟؟
محمد السيد : ايوة ياكبير .. انت قلت امشي مع الاتجاه .. حصل ؟؟
داو : حصل ..
محمد السيد : طيب لغاية امتى ؟؟ من غير نهاية كده ..؟؟ دا الواحد لو متجوز واحدة عن حب
عنيف من بتاع روميو وجولييت ده هيمل منها بعد سنة ..عاوزني امشي مع الاتجاه طول
العمر !! بقه دا كلام !!


---------- Post added at 03:01 AM ---------- Previous post was at 02:58 AM ----------

داو : ايوة يابني ما انا قلت خليك مع الاتجاه وماسكتش برده .. قلت لغاية ما ينعكس عليك
ويتاكد الانعكاس ..
محمد السيد : شفت بقه حضرتك قلت ايه لغاية ما ينعكس .. وكمان يتاكد الانعكاس ..
واشترطت انه عشان يتاكد مش بس يكسر الترند وانما كمان يكسر القاع اللي مش
عارف ايه تمام ؟؟
داو : ايوة .. امال اسيبكم تخشوا صفقاتكم مع الاتجاه من غير ما اعرفكم تقفو امتى ؟؟
محمد السيد : وانت كده عرفتنا نقف امتى ؟!!.. دا ياعم الحاج لما ننتظر العلامة اللي انت قلت
عليها دي نكون خسرنا اللي كسبناه .. او اغلبه على الأقل.. مش حرام كده ؟؟!! انما عم
اليوت الله يبارك له عرفنا اهداف الاتجاه وقالنا نقف امتى عشان مانخسرش ولا فتفوتة ..
قصدي ولا نقطة .. يعني قالنا الموجة 1 حافزة – بتتكون من 5 موجات دافعة كل منها
تتكون من موجات اصغر5،3،5،3،5 او قطرية امامية وهي مثل الحافزة الا انها تفترق
عنها في شئ واحد ان الموجة الرابعة متداخلة مع الأولى ، وبتساوي نسبة ...
فيبوناتشي من موجة التصحيح اللي قبلها والموجة 2 التصحيحية بتيجي ... وبتصحح
من الموجة 1 من 74.6 : 79%


---------- Post added at 03:12 AM ---------- Previous post was at 03:01 AM ----------

داو : وانتو كمان بتشتغلوا في التصحيح !!!
محمد السيد : مش بالضبط كده .. احنا بس بننتظر ونراقب تكون الموجة التصحيحية وبندخل في نهايتها مع الاتجاه العام عشان نجيب الموجة الاندفاعية اللي مع الاتجاه العام من اولها ودي نقطة دخول طبعا مضمونة جدا ..
داو : ياسلام .. على كده بقه انتم ما بتستعملوش الاستوب لوز ؟؟ هيلزمكم في ايه ما انتم
داخلين من اول سطر .. مفيش سطر قبله
محمد السيد : لا والله ياجدو بنستعمله برده .. وبيتضرب ..
داو: ازااااااااي يابني انت هتجنني ؟؟ كل الدقة دي وبيتضرب !!!
محمد السيد : ياجدو ما تستغربش .. بنستعمله لان احنا ممكن نغلط في تشخيص النموذج
الأليوتي التصحيحي فبنحط استوب لوز للأمان
داو : وانتم بتغلطوا ازاي يعني مش النماذج دي اليوت موضح ليكم قواعدها ؟؟
محمد السيد : ايوة بس فيه مننا اللي بيبدا ترقيمها من مكان غلط .. يعني مش من نهاية
الموجة الاندفاعية السابقة ، وفيه اصلا اللي بيرقم الموجات الداخلية من درجة أخرى
اعلى او اقل من الدرجة اللي المفروض تترقم فيها .. وهي طبعا بتتحسب من الدرجة
الأقل مباشرة لدرجة الموجة اللي بدأ فيها التصحيح .. وساعات ما بيكونش فيه غلط من
ده ولا من ده وانما بيشتبه علينا شكل النموذج نفسه يعني نفتكره مسطح يطلع متعرج
نفتكره متعرج يطلع مثلثي نفكره بسيط يطلع مركب ، نفكره مركب من نوع واحد يطلع
مركب من نوعين او حتى ثلاثة


---------- Post added at 03:17 AM ---------- Previous post was at 03:12 AM ----------

داو : ايه ده كله يابني .. دي العملية ملعبكة اوي .. وقادرين تفهموا ده كله ؟!! ويتوجه لاليوت
سامع ياسي اليوت .. ههههه .. اهه نظريتك كمان مش عاجباهم ، المهم .. كمل كلامك ..
محمد السيد : ايوة ..الموجة 3 بقه بتيجي حافزة بس .. وطولها قالوا انها طول الموجة الأولى
على الأقل ، وقالوا انها 161.8% من الموجة الثانية ، وقالوا لا دا من الموجة الأولى ،
وقالوا انها 261.8% من الثانية ، وقالوا 261.8% من الأولى ..
داو : ايه ده كله يابني؟؟ ومين دول اللي قالوا ؟؟ وانتم ماشيين على ايه ؟؟
محمد السيد : الحقيقة يا جدو اللي قال كده اتباع عمو اليوت .. اما احنا ماشيين مع مين ؟؟
احنا ماشيين بالبركة .. يعني انا عن نفسي بامشي باقل هدف وهو طول الموجة الأولى
وخلاص عشان السعر ما يفاجئنيش وينعكس على ..
داو : آه يعني لسة تايهين ، البس ياسي اليوت .. وانت بقه يابني بتمسك في المضمون
محمد السيد : ايوة طبعا ..استنى دا انا لسة ما كملتلكش دي الموجة الثاثة دي حكاية دي ممكن
تمتد عن كده كمان .. قال ايه ياسيدي انها لما تطول وتكسر المستوى 261.8% وتقفل
بعده انتظرها بقه هاتجيلك عند المستوى 423.2% فيبو اما الموجة الرابعة بقه .. ...


---------- Post added at 03:20 AM ---------- Previous post was at 03:17 AM ----------

داو : استنى .. استنى .. انت ايه حكايتك ؟؟ هم كام موجة ؟؟ ما بيخلصوش والا ايه ؟؟
محمد السيد : لا .. بيخلصو هم 8 بس 5 دافعة في الاتجاه العام وثلاثة تصحيحية .. المهم
الموجة الرابعة برده بتصحح 38.2% من الموجة الثالثة ده غالبا .. ممكن اقل شوية
ممكن اكتر شوية المهم ماتتجاوزش نهاية الموجة الأولى يعني ما تتداخلش معاها
داو : وايه يعني يبني لو تداخلت معاها حتة صغيرة ماهم الاتنين اخوات
محمد السيد : لا يا كبير وانت مايخلصكش .. لأن ده لو حصل مش هتبقى حافزة واحنا عاوزين
السوق يمشي في اتجاه .. المهم ياكبير الموجة الرابعة دي برده تصحيحية زي الموجة 2
لكن مش هم اخوات ؟؟.. في اغلب الأحيان ما بيجوش شبه بعض ، وبيحصل بينهم تبادل
داو : يعني ايه تبادل ده ؟؟
اليوت : اقولك انا يابا .. يعني لو واحدة جت حادة قوي ودا بيحصل مع التانية كتير تيجي
الرابعة منفرجة وده بيحصل مع الرابعة كتير ، ولو واحدة صححت في مدة قصيرة تصحح
التانية في مدة كبيرة ، ولو واحدة صححت بنموذج اليوتي معين التانية تصحح بنموذج
اليوتي تاني لكن انا لا حظت ان الرابعة بالذات هي الوحيدة اللي ممكن ييجي فيها نموذج
اليوتي مثلثي والثانية لا .. وموضوع التبادل على كل حال مش حتمي يعني ممكن يحصل
تبادل وممكن مايحصلش وييجو، زي بعض بالضبط .. وفي كل حاجة ههههههه

[محمد السيد]

داو : بتضحك والله بابني انت هاتجنني .. يعني ماهيش قاعدة .. !!! امال انتم عمالين تحشوا
رووس العيال بكلام فارغ وخلاص ..؟؟!!
اليوت : معلش يابا .. بنشغل وقتهم بدل ماينحرفوا ويقفواعلى النواصي يعاكسوا البنات
ويشربوا بانجو ..
داو : بانجو .. ممكن تسكت انت خالص لغاية مالواد الغلبان ده اللي انت واعوانك كفرتوا
سيئاته يخلص كلامه .. لأني عاوز اساله سؤال بعد ما يخلص ؟؟ايوة يامحمد كمل كلامك..
وقفنا عن الموجة الرابعة وبعدين ؟؟
محمد السيد : ايوة .. الموجة الخامسة دي ياجدو حكايتها حكاية وان بصراحة ما بحبهاش
وبخاف منها
داو : ازاي يابني .. هي زعلتك في حاجة قوللي ؟؟
محمد السيد : لا .. هي اولا بتيجي برده من النوع الحافز ، وممكن تيجي قطرية خلفية اونهائية
زي ما بيقولوا وهدفها ده اللي بيحيرني يقولوا ان ما يقلش عن 38.2% من الموجة
الرابعة وممكن الموجة تنهار او تنقطع .. وبعضهم قال ان ده لو حصل فده معناه ان هيكون
هناك اتجاه انعكاسي كبير بعد كده ، وفيه ناس قالوا انها ممكن تصل في الطول لطول
الموجة الأولى ومنهم اللي قال لا 161.8% من الأولى ومنهم اللي قال ان المجموعة
الدافعة كلها على بعضها بتيجي 423.6% من الموجة الأولى ومنهم اللي قال احنا ممكن
نحدد هدفها باننا نعمل ترند من نهاية الثانية لنهاية الرابعة ونعمل خط موازي له على قمة
الموجة الثالثة ، وهدف الخامسة هيكون عند التقاء السعر مع الترند الموازي ، ولو تلاحظ
لينا ان الموجة الرابعة كانت ضيقة نعمل خط تاني على قمة الأولى وننتظر السعر عنده ..
.. لا .. وممكن تمتد زي ما التالتة بتمدتد .. لو انت مكاني تعمل ايه ؟ يعني تحدد هدفك فين؟


---------- Post added at 03:28 AM ---------- Previous post was at 03:23 AM ----------

داو : انا لو مكانك مش هادخلها اصلا
محمد السيد : ليه ياجدي ؟؟
داو : انت يابني مش قلت في اول كلامك انها ممكن تنقطع ؟؟ وما تصححش الا 38.2% من
الموجة الرابعة والموجة الرابعة نفسها بتيجي ضيقة .. هاوجع قلبي في ايه بقه عشان
شوية نقط هايفين ييجي الانعكاس ياكلهم مني ؟؟
محمد السيد : هههه .. صايع ياجدو ..
داو : اتحشم ياولد ..
اليوت : ممكن يابا اتكلم كلمة واحدة ومش هافتح بقي تاني ؟؟
داو : اتفضل ياسيدي قر ..
اليوت : اولا : الانعكاس مش هيفجاك ولا حاجة لو تابعت الموجة.. وانت هتحس بانه هيحصل
لما تجد ان النموذج الأليوتي قد انتهى ومابيحصلش الانقطاع غالبا الا لما بيحصل اصلا
امتداد في التالثة وبعدين الأهم من ده كله انت بالطريقة دي بتعرف الاتجاه هيخلص امتى
بالضبط فبتلحق نفسك وتخرج من صفقتك قبل ما تخسر اللي انت كسبته .. حتى من قبل
مابيكسر الترند وهتعرف فعلا ان الكسر ده حقيقي وممكن التاجر لو عاوز يشتغل على
الانعكاس فدي فرصة له برده ..
داو : خلصت كلامك .. كمل يابني


---------- Post added at 03:31 AM ---------- Previous post was at 03:28 AM ----------

محمد السيد : بعد كده ياجدو ثلاث موجات انعكاسية الأولى بنسميها a ودي عكس الاتجاه
العام بس الشهادة لله ياجدو بتيجي في أحيان كتير قطرية امامية وبتصحح من الموجة
الخامسة .. % على الأقل ، بييجي بعدها الموجة b موجة لذيذة اوي ياجدو موجة
بترجع جزء من الخساير اللي خسرها التجار في الصفقة اللي مع الاتجاه .. ليه بقه لأنها
رغم انها تصحيحية بتيجي ضمن موجات التصحيح لكن اتجاهها يوافق الاتجاه العام ..
هتقولي يعني هي بتيجي حافزة وكده .. اقولك: لا .. رغم انها بتيجي مع الاتجاه الا ان
موجاتها اللي بتتكون منها بتتكون من نماذج تصحيحية معقدة .. بعد كده في الموجة c
ودي موجة بتيجي في احيان كتير قطرية خلفية زي الخامسة الا اذا كانت a جاءت قطرية
امامية .. ايوة ماهو قطريتين في التصحيح توجع هههه وبتصحح .. % من الموجة b
داو : خلصت كلامك .. ؟؟
محمد السيد : يعني تقريبا ..
داو : انا عاوز اسالك سؤال ادام عمك اليوت وتقول الصراحة وماتخافش منه .. ايه رايك في
نظريته ؟؟ وهل بتجاوب على كل الاسئلة اللي في راسك وانت بتتاجر انت وزمايلك ؟؟


---------- Post added at 03:34 AM ---------- Previous post was at 03:31 AM ----------

محمد السيد : والله ياكبير انت سالت السؤال اللي هو يعني .. وانا هجاوبك بكل صراحة ..
اولا : تحديد الاتجاه العام والتفرقة بينه وبين التصحيح احنا ممكن نعرفها من غير ما نبص
للموجات الداخلية .. يعني انا مش هاعرف اخويا الا لما اتحقق من ملابسه الداخلية!!
ههههه
داو : كويس .. كمل وبطل لماضة ..
محمد السيد : اما وقت الدخول الصحيح في الصفقة فحق الله هو حدده بدقة .. وكان موضوع
الدخول ده صعب عندي .. كنت ادخل مع الاتجاه افاجا بان السعر ينعكس علي ومش
عارف ليه ؟؟ اتاريه لسة بيصحح ويظل يرجع وابقى خايف ليضرب الاستوب وافضل
استعطفه لكن زي عدمه يضرب الاستوب برده .. فاظن ان الاتجاه انعكس فادخل عكس
الاتجاه فينعكس علي تاني ويضرب الاستوب .. ونظرية عم اليوت فهمتني ان انا بادخل
قبل نهاية النموذج الأليوتي –يعني قبل انتهاء وبداية الانطلاق في الاتجاه العام عشان
كده بيتضرب الاستوب .. اقولك الحق انا كنت اكر ان فيه حد مستقصدني
داو : طيب انت مش بتقول ان برضه بيتضرب لك الاستوب لوز رغم انك دارس موجات اليوت؟
محمد السيد : ايوة ياجدو بس السبب مش من النظرية .. السبب مني انا وزملائي بنبدا الترقيم
للموجات من بداية غير صحيحة ، وبعضهم بيحسب الموجات الداخلية من درجة غير
مضبوطة .. او ما بنقدرش نحدد النموذج الأليوتي التصحيحي بالضبط في كل مرة
وبيستشكل علينا امره .. بالبلدي كده تطبيقها عامل فك الطلاسم


---------- Post added at 03:38 AM ---------- Previous post was at 03:34 AM ----------

داو : طيب انا عاوز اسالك انت بتدخل صفقتك ازاي ..؟؟ يعني مثلا انت حسبت من الدرجة ..
كذا المناسبة لحساب الموجات الداخلية للموجة اللي انت واقف عليها وبدات فعلا من
نهاية الموجة الاندفاعية وعرفت ان النموذج الموجي التصحيحي هو نموذج .. كذا وانه
خلاص انت في آخر جزء منه بتتصرف ازاي ؟؟ اشرح لي
محمد السيد : انا هقولك يا جدو بس ما تضحكش علي ..
داو : قول مش هضحك ..
محمد السيد : انا بصراحة ما بدخلش الا في حالات معينة : لما تكون الموجة مثلثية قبل ما
لموجة e تلمس ضلع المثلث ، او في نهاية ثالث موجة تصحيحية من موجات الفلات او
المتعرجة ..
داو : انا مش فاهم كلامك خالص ..
اليوت : ممكن اقولك انا يابا ؟؟
داو : قول
اليوت : شوف ياسيدي .. ساعات النموذج الأليوتي التصحيحي يتكرر مرتين او ثلاثة لكن اكتر
من تلاتة لا فلو دخل بعد نهايةالنموذج الأول ودخل عليه النموذج التاني ممكن يتضرب
له الاستوب لوز .. وطبعا نفس الحكاية ممكن تحصل لو استعجل ودخل في نهاية النموذج
الثاني فبيضطر ينتظر حتى نهاية النموذج الثالث ويدخل من نهايته ، اما نماذج المثلثات
بتكون نماذج بتيجي في نهاية التصحيح فبيدخل عادي علي نهايتها ..


---------- Post added at 03:42 AM ---------- Previous post was at 03:38 AM ----------

داو : طيب ده بالنسبة للحالات اللي بتنتهي بمثلث او بيتكرر فيها النموذج السيمبل التصحيحي
الحالات الدبل أو السيمبل وهي الأغلبية طبعا بتعمل فيها ايه ؟؟
محمد السيد : والله ياكبير اما باعمل ترند على القمم السابقة واللي انا عارف ان السعر لو
مشى في اتجاهه العام هيخترقها وانتظر اذا حصل اختراق ثم أغلقت للشمعة بعد الترند
وفي نهاية النموذج الموجي اعرف انه انهى تصحيح وادخل مباشرة ..
اليوت : انت بتقول ايه ..؟؟ انت مش عارف انك لو دخلت مع الكسر ممكن يكون الكسر وهمي
بسبب طول الموجة c في الموجة التصحيحية الفلات ؟؟!!
محمد السيد : ما انت لو واخد بالك من كلامي .. انا بقول الكسر ناحية الاتجاه العام
داو : جدع يابني .. قوللي بقه بتنجح الطريقة دي ؟؟
محمد السيد : ايوة وكمان انا عشان اكون متاكد ان الكسر ده حقيقي ومش وهمي او عشان
النموذج السعري يكتمل بابص على الفوليوم فان وجدته عالي اعرف ان السعر هيروح
وماعدش هيورينا وشه الا لما يوصل للهدف ، والطريقة دي انا باستعملها في الدخول
عامة لأنها هي الأضمن اسمها طريقة عم ديمارك ..

[محمد السيد]

داو : يعني انت ما بتثقش في نظرية اليوت عند الدخول .. او بمعنى آخر لا تكفيك للدخول
محمد السيد : بس معلش ياجدو هي على الأقل بتعطيني اهداف للخروج ..
داو : هههههههه اضحكتني ياحفيدي .. دا تحديده للهدف هو اللي يضحك .. انت مش فاكر انت
قلت ايه عن الهدف للموجة الثالثة وكم احتمال على الهدف .. ياطول الموجة الأولة يا
161.8% منها او 263.8% منها با هتمتد اكتر والا الخامسة اللي ممكن تبقى زي
التالتة او ممكن تنقطع .. ياحبيبي انت لما تحب تحط هدف هتحطه على اي احتمال منهم
بالضبط ؟؟!! مش هتحطه على اقل احتمال عشان الأضمن ؟؟ طيب فين الربح بقه بعد
الغلب اللي انت شفته في متابعة النماذج ؟؟ وتمقيق العنين في البحث عن الموجات
وانت حليتها .. بتتعامل مع عمك ديمارك وبتدخل عند كسر الترند والغلق بعدها طبعا +
التاكد من قوة الفوليوم عند الكسر .. دا كلام سليم ..


---------- Post added at 03:48 AM ---------- Previous post was at 03:45 AM ----------

داو يتوجه الى اليوت : قلت للناس اني ما حددتش الاتجاه .. وان بقولك انهم مش محتاجين
يعرفوه الا بنظرة للشارت على فريم كبير يبدا من اليومي مثلا ..
قلت لهم يدخلوا منين او امتى بالضبط وبيخافوا يدخلوا من كتر الاحتمالات ولجؤوا لديمارك
لأنهم مش واثقين فيك كفاية .. او بمعنى آخر كلكعتلهم الدنيا .. وهم حاسين انهم مهما
برعوا في فهم نظريتك هيفشلوا في التطبيق .. قلت حددت لهم الهدف وحطيت له 10
احتمالات وكانك يابو زيد ما غزيت .. وتسمع بقه من اتباعك ان السعر لو كسر النقطة كذا
هيوصل لكذا .. او لكذا أو لكذا .. قوللي بقه عملت ايه ؟؟ فسرت لهم ايه سبب ان الكسر ده
طلع حقيقي والكسر ده طلع وهمي ؟؟، والا قلت لهم ليه الخبر للعملة رغم انه جه لصالحها
الا ان سعرها نزل في الأزواج اللي بتشترك فيها ؟؟ هي دي حاجة مهمة .. بتفتخر علي
بايه؟؟ تقدر تقوللي
انا عاوزك تنزل تسال الناس اللي بيشتغلوا بنظريتك الوقت ..التصحيح اللي في اليورو
دولار دلوقتي وبادئ من يوم 13 / 3 / 2015 ولازال شغال لغاية اليوم بيحقق نموذج
ايه ؟؟ وهينتهي امتى ويبدا السعر في الانطلاق للاتجاه العام؟؟
اذا وجدت حد منهم جاوبك اجابة تشبه اجابة التاني يبقى لك الكلام .. عشان كده انا
بقوللك ما عنتش تتأنتك على لأنك ما جبتش جديد .. ان كانت انا نظريتي ناقصة .. انت
ماجبتش التحديد الصحيح والنهائي لنقطة الدخول وكذلك نقطة الخروج ..


---------- Post added at 03:51 AM ---------- Previous post was at 03:48 AM ----------

محمد السيد : في الحقيقة ياجدي فيه سؤال انا كنت عاوز اساله لعم اليوت .. ومش عاوزه
يزعل مني احنا بنتناقش وكل واحد فينا بيقول رايه ،وفي الآخر بنقول ان الخلاف لا يفسد
للود قضية .. انا عاوز اساله سؤال محيرني وهو مكون من شقين :
الشق الأول : انت بتقول ان الاتجاه في كل الدورات عموما بيتكون في شكله البسيط من
5 موجات صاعدة مثلا وثلاثة تصحيحية ..ولما بتخلص هذه الدورة بنبدا في دورة ثانية
مكونة من ذات الموجتين يعني صاعدة ايضا يعني هييجي بعد التصحيح اطلاق مرة اخرى
للاتجاه الصاعد ثم تصحيح ثم موجة للاتجاه العام .. وتبدا الدورة الكبرى في التصحيح
بالموجة a وهي موجة كبيرة لأنها من دورة كبيرة .. الا نستطيع حيث اننا نعمل في
الدورة الأصغر ان نعتبرها بالنسبة لنا اتجاه عام ونعمل في اتجاهه ؟؟
الشق الثاني :على حسب نظريتك – او هذا ما سمعته - ان السعر يتجه لأعلى مثلا في 8
سنين ثم يصحح في 5 سنين ثم يعاود الصعود 8 سنين ثم يهبط في 4 سنين .. وهكذا ولو
كان الأمر كما تقول لراينا السعر يصعد فقط ولا ينزل ابدا ، او ينزل فقط ولا يصعد ابدا ..
مع العلم انا اري السعر في الشارت حتى في فريم الشهري يصعد وينزل ايضا وبنسب
متساوية تقريبا فما ردك على ذلك لماذا لا يصعد فقط او لا ينزل فقط ؟؟ كما تقولون ام ان
هذه المعلومة وصلتني على سبيل الخطا ؟؟ ارجو التوضيح ..
اليوت ينصرف ولا يرد ..


---------- Post added at 03:53 AM ---------- Previous post was at 03:51 AM ----------

محمد السيد : الله .. هو مشي ليه وماردش علي .. ؟؟ زعلان مني والا ايه ..؟؟
داو : لا يابني هو مش زعلان منك ولا حاجة .. هو ميت والميت مابيجاوبش حد
محمد السيد : طيب ما انت بترد على اهه !!
داو : ايوة انا برد عليك لكن برده مش هعطيك اجابة
محمد السيد : طيب اعمل ايه في حيرتي دي ؟؟ اقولك انا هاسال زمايلي في المنتدى يمكن اتقي
عندهم اجابة .. انا متشكر اوي ياكبير
داو : على ايه يابني ما انا سيبناك برده حيران وموصلناكش لحل على كل حال سلامه عليكم
محمد السيد : وعليكم السلام ورحمة الله وبركاته ..
.. زملائي الأحباء ..
سيبوكو من السؤالين اللي انا قلتهم دول .. انا عاوز واحد يرفع ملف وياريت يكون فيه صور
يوضح ببساطة شديدة خطوات ترقيم الموجات
انا عارف ان فيه احد الاخوة رافع فيديو مكون من 6 اجزاء لكن الفيديو مش واضح
وعارف ان فيه اخوة رافعين ملفات بي دي اف وقراتها كلها وبرده مش فاهم منها حاجة
.. معلش انا عاوز اللي يكتب في الموضوع ده يكون استاذ مايكلفتش لأن الموضوع مهم فعلا ويكون اشتغل بايده ووصل فعلا لنتائج جيدة تؤكد صحة عمله
او لو فيه كتاب اسلوبه بسيط لواحد ذكاؤه على قده زي حالاتي يرفعه .. وقبل ان يفعل .. اطلب من الله له ان يجازيه عنا وعن كل من سيستفيد منه من اعضاء هذا المنتدي كل خير ..
والسلام عليكم ولرحمة الله وبركاته

[Ahmed abdelal]

السلام عليكم ورحمة الله وبركاته مشكور اخى على طرح المعلومة
التى افادتنا جميعا وفى انتظار كل جديد تقدمه وربنا يوفق
الموضوع كتير سهل والشرح مبسط الله يعطيك العافية يا اخى
واتمنى التوفيق للجميع
والسلام عليكم ورحمة الله وبركاته

[مصراوى]

اخى الفاضل بالفعل موضوع ممتاز واستفدت منة كثيرا وننتظر المزيد من تلك المواضيع التى تضيف الينا الكثير وبالتوفيق

[KOKOFOAD]

بسم الله الرحمن الرحيم
مشكور اخى الكريم على موضعك الهادف والمتميز والبناء وتوضيحك الرائع والمفيد
بالتوفيق دائما وفى انتظار المزيد

[Federerista]

مشكور اخي حوار شيق وفيه معلومات جد مفيدة يجب استنباطها نضرية اليةت فعلا قد كانت ومازالت من اعتد النضريات في الفوركس

[almared13]

السلام عليكم ورحمة الله وبركاته*
شكرا على هذا الموضوع المفيد اخوانى الكرام فى انتظار المزيد من هذه المواضيع المفيدة والغنية بالمعلومات بارك الله بيك وشكرااا

[madmax07]

السلام عليكم ورحمة الله وبركاته شكرا اخي الفاضل على موضوعك كان ياما كان واتمني الافادة للجميع و المزيد من مواضيعك.

[Zezobebo3]

هههههههههههههههههههههه والله موضوع حلو يعم اهو غير من الروتين بتاع المندى وياريت تكثر من مثل تلك المواضيع التى تضيف روح الفكاهه والدعابه فى المنتدى .

[fanta]

السلام عليكم ورحمة الله وبركاته

بارك الله فيك اخي على هدا الموضوع الجميل و ربي يجعلو في ميزان حسناتك

الله يهدينا و يهدي جميع المسلمين جزاك الله خيرا وبارك فيك

[zakiki51]

شكرا اخي الكريم على هذا الشرح
نتمنى المزيد من المواضيع تقبل مروري
رغم ان هناك الكثير من المبتدئين لا يعلموع هذا الموضوع
وشكرا جزيلا

[zam_bozo]

والله حوار دمه خفيف وانا شعرت انني اشاهد داو واليوت وهم يتحاوران معك .. وفهمت ما مجمله ان داو قال خليك مع الاتجاه
حتى ينعكس ولما جاء اليوت حاول يضع حدود للاتجاه والتصحيح فاتى باحتمالات كثيرة أفقدت نظريته قوتها
وكان من نتائج نظريته انك لا تجد اثنين من اتباعه ترقيمهم واحد وعليه لم تحل المشكلة