كل شيى بيد الله سبحانه وتعالى
من حوالي اسبوع كنا شغالين في حالة قلب مفتوح لشاب عنده ١٨ سنة.. وبعد ما خلصنا اصلاح العيب الخلقي والحمدلله الأمور ماشيه كويس وفي لحظة معينة وقبل ما نقفل صدر العيان .. حصلت كارثة حرفيا.. نزيف شديد.. نافورة من الدم تخرج من الشريان الأورطى ومش قادرين نوقفها.. ثواني وكان القلب فضي تماما من الدم وابتدى يتوقف عن العمل.. مافيش ضغط دلوقتي.. دم الشاب بقى في كل حته حوالينا.. لدرجة ان دمه غرق لبسنا تماما وبقينا واقفين علي بركة دم..حالة من قلة الحيلة للحظات سادت المكان مع شلل في التفكير.. لحظات اخرى وتمت السيطرة على النزيف بتوفيق من ربنا.. فريق التخدير بيدفع الدم والبلازما دفعا لاوردة العيان عشان يرجع الضغط تاني كويس..
وفي الرعاية كان كل انتباهي ان العيان يفوق كويس ومايحصلش تأثر بلحظات انخفاض الضغط..
الحمدلله العيان فاق كويس وفصلته من جهاز التنفس الصناعي.. بعدها طلب يشرب ميه وبعد ما خلص قالي: دكتور انا عمليتي مشيت كويس؟
لحظة صمت طويلة افتكرت فيها كل حاجه حصلت.. وبعدين قلتله: الحمدلله :) كل حاجه عدت على خير.
الشاب ده خرج من المستشفي النهاردة بالسلامة..
