مراجعة حول Itel P36 Pro – أفضل موبايل ممكن تشتريه بـ 1500 جنية فقط بمميزات كتير !

مراجعة حول Itel P36 Pro – أفضل موبايل ممكن تشتريه بـ 1500 جنية فقط بمميزات كتير !

التصميم :-
موبايل P36 Pro بيجي بتصميم من البلاستيك بالكامل .. شيء طبيعي في الفئة دي .. وعمومًا مُستخدم الفئة الإقتصادية بيهمه أكتر شكل التصميم .. وهنا شكل التصميم مُحترم جدًا فيه تدرج على اللون مع إنعكاسات بسيطة للضوء .. تصميم شيك جدًا بصراحة.
وعلشان دي فئة إقتصادية .. فا لازم نهتم بالإضافات اللي جوا العلبة .. وهنا شركة Itel هتقدملك في العلبة جراب شفاف بلاستيك مع سكرينة وسماعة .. محتويات مقبوله جدًا جدًا في الفئة دي.

الشاشة :-
شاشة كبيرة بتيجي بحجم 6.5 بوصة من نوع IPS LCD بدقة HD+ .. والشاشة فيها نوتش صغير Water Drop موجود فيه الكاميرا السيلفي.
شكل الشاشة يمكن من أهم مميزات الموبايل ده .. لإن الفئة الإقتصادية صعب تلاقي فيها شاشة بالشكل والحجم وإستغلال الحواف ديه.

الأداء :-
الموبايل هنا جاي بمعالج ثماني النواة بتكنولوجيا 28 نانو من شركة يونيسوك .. وإسم المعالج SC9863A.
والأداء هنا كويس جدًا مقارنتًا بالنسخة العادية لإنه ثماني النواة مش رباعي زي النسخة العادية .. الفرق واضح وصريح .. وكمان النسخة البرو بتيجي بـ2 جيجا رام مش 1 جيجا رام زي النسخة العادية.
وكل ده منعكس على الأداء بشكل واضح جدًا .. النسخة البرو فعلًا تقدر تعتمد عليها بشكل كامل وتقدر تسطب كل برامجك الأساسية من غير ما تحس إنك متضايق من بطيء الموبايل.
المعالج الرسومي اللي هنا مقبول جدا ..*بدأت تجربة الألعاب بلعبة*Subway*اللي كانت بتعلق على النسخة العادية .. بس النسخة البرو شغلت اللعبة بكفاءة من غير اي مشكلة.

عوامل الأمان وعناصر اخرى :-
الموبايل فيه بصمة في الظهر .. غاطسة جوا الظهر شوية علشان تميزها بسهولة، والبصمة أدائها مُرضي جدًا ..*والـFace Unlock كمان سرعته مقبولة جدًا .. وعوامل الأمان هنا أسرع بفرق واضح عن النسخة العادية.

البطارية :-
البطارية في موبايل الـItel P36 Pro بتيجي بحجم 5000 مللي أمبير زي النسخة العادية بالظبط .. هتستحمل معاك نفس الوقت تقريبا .. حوالي 8 ساعات شاشة مفتوحة وده وقت مرضي جدًا في الفئة ديه.

الكاميرات :-
الكاميرا الخلفية ثُنائية .. الأساسية 13 ميجا بيكسل والتانية للذكاء الصناعي .. والسيلفي بتيجي بدقة 8 ميجا بيكسل .. والسوفت وير هنا فعلًا فيه ذكاء إصطناعي، مش زي النسخة العادية.
الموبايل بيقدر يطلع صور مقبولة جدًا طول ما الإضاءة عالية .. يعني لو عايز تصور أي حاجة هتقدر بسرعة تطلع الموبايل ده وتصور والصورة هتطلع واضحة .. بس زي ما قولتلك لازم إضاءة عالية.
وكويس جدًا إن في هنا تصوير بورترية سواء بالكاميرا الخلفية او الأمامية .. هو اه البورترية هنا مش ممتاز .. بس أهو موجود .. متتوقعش أداء أحسن من كدا من كاميرات الموبايلات الإقتصادية عمومًا.

سعر الموبايل :-
سعر الموبايل الرسمي 1500 جنية للنسخة 32 جيجا مع 2 جيجا رام.


ارجو ان تعم الافادة على الجميع وتقبلو مرورى ..........