تجربتي مع اداره الحسابات

كان ليا تجربة فى ادارة حسابات سابقا واقدر انصحك النصائح التالية من خلال تجربتى
اولا ادارة حساب شخص اخر هى مسؤليه كبيرة وهيكون عامل النفسيه فيها اعلى من انك تتداول فى اموالك انت لان خسارة اموالك الخاصة مش مشكله لكن خسارة اموال غيرك مسؤوليه وممكن تسبب حملة من التشويه لشخصك لان فى مجتمعنا مهما عملت اتفاقيات فى البدايه وان فى ربح وفى خساره هو داخل معاك على انه هيكسب بس ويوم ميخسر مش هيهتم بطبيعة السوق لكن هيتهمك انت بالنصب والاحتيال

ثانيا انت فقط المتحكم فى الحساب لان بعض اصحاب الحسابات بيتدخلوا بصفقات او باى اجراء على الحساب يسبب ليك انت خساره وفى النهايه بتبقى انت المسؤول الاخير عن اى ربح او خساره فاشترط على صاحب الحساب من البداية ان اى حاجه خاصة بالتداول على الحساب تكون قرارك انت فقط

ثالثا خلى صاحب الحساب دائما مراقب لادائك واتفق معاه على نسبة مخاطرة معينة على سبيل المثال 20% من راس المال يعنى لو وصلت لنسبة خساره فى مجمل الصفقات توصل ل20% من راس المال يكون لصاحب الحساب الحق فى ايقاف التداول او لو قرر يكمل يبقى دا قبول منه بالمزيد من المخاطرة

رابعا والاهم خلى الحد الادنى لراس المال للادارة مناسب بحيث انت تحصل على نسبة ربح جيدة لانى للاسف من اخطائى فى تجربتى هى قبولى بحجم راس مال صغير فى النهاية كنت بلاقى نفسى بحصل على نسبة ربح متتناسبش مع مجهودى ولو كنت بشتغل على حساب اكبر كان الموضوع هيفرق