بسم الله الرحمن الرحيم
نبتدى بمشيئة الله الجزأ الثاني و هو الجزأ الخاص بالتأشيرةو تجهيز الورق للحصول عليها
و هو حقيقة أرخم جزأ في الموضوع كله ، ححاول اختصر عل أد ما قدر في الجزأ ده علشان هو يفتقد الى المتعه
الموجودة بباقي الأجزاء ان شاء الله ، طبعا انا اول ما جالى ايميل من الجهة العلمية في ايطاليا بالموافقة على حضورى مؤتمر علمي
بدأت أجهز نفسي و اوراقي و كان اول حاجة جهزتها في ملف السفر هو جواب الدعوة من تلك الجهة
طيب في ناس كتير حتقولي طيب احنا ازاي يجيلنا جواب زي ده ، اقولكم اكيد كل واحد له تخصص معين في شغله
هو ممكن يدخل على النت و يدو على ورش العمل workshops او اللقاءات التخصصيه في تلك النقطة meeting
او المؤتمرات اللى تخص شغله و رفع كفاءتها conferences و يحاول يشترك فيها و يدور طبعا على ارخص حاجة فيهم علشان الحاجات دي بتبقى في أكثر الأحيان مكلفة ، طيب ليه الجزأ ده ؟؟؟؟ ما هو احنا ممكن نطنشه، فعلا ممكن ، بس ساعتها حيبقي مطلوب منك حساب بنكي كبير و محترم ، اما حجة السفر لحضور اي تدريب علمي بيكون حجة امام السفارة بتقلل المبلغ المالي المطلوب في حسابك البنكى ، اما لو مسافر لمجرد السياحة فقط فيبقي لازم تيقى أدها و توريلهم حساب بنكى محترم ، متهيألي اتفهمت النقطة دي، ليه حنخاول ندور على اي حاجة علميه في تخصصنا للاشتراك فيها ، نكمل بقى
حنتصل بالسفارة و نحدد ميعاد و دلوقتي بقى تقريبا لكل السفارات مواقع على النت ممكن من خلالها تحديد المواعيد
طبعا الاتصال بيتم قبل السفر بحدود 4 شهور علشان المواعيد بتكون خلال 3 شهور فقط قبل السفر
و بيكون عليها الورق المطلوب منك و هو تقريبا التالي:
1- جواز سفر شخصي مازال ساري المفعول لفترة لا تقل عن 6 شهور
2- 3 او 4 صور شخصيه ( بيختبف المقاس و الشروط على حسب السفارة )
3- جواب الجهة الداعية و هو ايميل الجهة العلمية اللى انت اشتركت فيها
4- حساب بكى ل 6 شهور ( لايتجاوز تاريخ استخراجه عن شهرين من موعد اللقاء )
5-تأمين عن فترة السفر ( من اي شركة تأمين في مصر، لو حتسافر في حدود اسبوعين تقريبا حتدفع في حدود 200 ل 300 جنيه )
6-حجز مبدأي للطيران ذهاب و عودة ( و ده بيكلف في حدود 100 جنية فقط علشان هو مش حجز نهائي )
7- حجز للفنادق خلال مدة السفر ( مواقع على النت كتير بتحجز بحوالى 10% مقدم فقط فورى )
8-جواب من جهة العمل يحدد وظيفتك و مرتبك
لو مش موظف و عندك مشروع تجيب برضه مايثبت من الجهة التابع ليها شغلك الخاص
9- لولم تسافر الى اوروبا من قبل فمطلوب منك شهادة تحركات من مجمع التحرير
تقريبا دي كل الاوراق المطلوبة و سامحوني لو كنت نسيت حاجة
طبعا اهم شئ في السفارة كلها علشان يدولك التأشيره هو ضمان عودتك
بمعنى لو انت موظف حكومي و جبت ورقه بكد فده بيسهل التأشيره الى أقصى حد
طيب لو مش موظف فيبقى لازم تثبت ليهم ارتباطك القوى بالعوده عن طريق مشروع قوي ليك هنا في مصر يضمن عودتك ،
كمشروع تجاري محترم او عيادة او اي شئ يعتبر ليهم انك مرتبط بيه
اما للأسف اكثر حالات الرفض بتكون لما يحسوا بعدم وجود شئ مادى يربط بالعوده فبيخافوا من هروبك و عدم عودتك
طبعا انسوا فيلم احمد حلمي و انك حتكلم عن هوا مصر و ارضها و نيلها و ناسها الطيبين
اللى انت متقدرشي تستغني عنهم و حترجع تاني علشانهم ، ده كلام مايأكلشي عيش معاهم ههههههه
كده ، حنهى الجزأ التاني
و ان شاء الله حبتدى معاكم المرة الجاية رحلتى الاولي للسفر خارج مصر مدعومة بصور حقيقية
و هي رحلة كانت من القاهرة ل روما ل تريستا ل فينيسيا ثم الغودة بنفس الترتيب
انتظرونى في الجزأ الثالث بمشيئة الله