بنسمع كتير عن عربيات بيحصل فيها مشاكل في الفتيس وسببت لأصحابها مشاكل كتير وغرمتهم فلوس أكتر وكل المشاكل دي على فكرة ليها أسباب ومقدمات، لوخدنا بالنا منها هنوفر على نفسنا دوشة كتير ممكن تحصل لو العربية ببساطة "جابت فتيس" ولقيت الميكانيكي بيقولك إنك لازم تغيره ..

لخصتلكوا النصايح دي في 7 نقط سهلة هنشوفهم دلوقتي :-

1- زيت الفتيس: لازم تكشف على مستواه وحالته بإنتظام، عشان لو مستواه أقل من العلامة زوده ولو بينقص بإنتظام لازم تعرف ليه ولون زيت الفتيس الجيد بيكون أحمر أو وردي، لو لونه بيميل إنه يبقى بني أو محروق فا لازم تغيره.
=-=-=
2- إستخدم نوع الزيت المناسب لعربيتك: وده اللي بينصح بيه مصنع العربية، عدم إستخدام النوع المناسب بيكون سبب مشاكل كتير بالذات في بعض الموديلات الحديثة.
=-=-=
3- إتأكد إن الزيت اللي جاي في العربية من برة: (لو العربية تقفيل برة) مناسب للبلد اللي هتستخدم فيها العربية، لأنه لو مش مناسب ومشيت بيه العربية أكيد هتجيب فتيس وده حصل في عربيات كتير.
=-=-=
4- الصيانة الدورية: راجع الكتالوج اللي جاي مع عربيتك وأعرف مواعيد الصيانة الدورية للفتيس لأن في الصيانة بيتكشف على خزنة الزيت للتأكد إن مفيهاش نشارة معدنية، والفلتر بيتغير لاااازم وعادةّ بتكون الصيانة الدورية كل 45.000 كيلو على الأقل وده بيختلف من عربية للتانية.
=-=-=
5- في حالة الجر: لو إضطريت تجر عربية تانية إتأكد إنها مش أكتر من الحمولة القصوى الموجودة في دليل المستخدم، وحتى لو في نطاق الحمولة القصوى برضو ممكن تجيب فتيس، فا تجنب إنك تجر أي عربية وده لأن الجر بيحمل على الفتيس جامد وبيرفع حرارته بصورة كبيرة، وده بيأكسد الزيت، والزيت المؤكسد مش بيقوم بدورة مظبوط سواء في التزييت أو التبريد، عشان كده لونه بيميل للبني أو المحروق، ولازم يتغير فوراّ أما لو الفتيس عندك من النوع "ستيب ترونيك" فـ في الحالة دي ممكن تستخدم النقل اليدوي لأن ده مش بيحمل على الفتيس بنفس الطريقة وبكده ممكن تتجنب أي مشاكل ممكن تحصل.
=-=-=
6- لما تيجي تنقل من "D" للـ "R" أو العكس: إتأكد إن العربية وقفت تماماّ قبل ما تقوم بالنقلة، لأنك لو نقلت لعكس الإتجاه قبل العربية ما تقف هتدمر التروس وأجزاء تانية معاه، وتكلفة الإصلاح هتبقى غالية لأنه في الحالة دي لازم الفتيس يطلع برة العربية ويتفك بالكامل.
=-=-=
7- لما تيجي تركن على طريق مايل: إرفع فرامل اليد الأول قبل ما تجيب الفتيس على "P" لأن كده وزن العربية هيبقى محمل على الفرامل مش على الفتيس، ولو حملت على الفتيس هيبوظ مع الوقت.