السلام عليكم ورحمة الله
كتير بنسمع عن الهيدج وناس كتير من المتداولين عارفة معناة وناس كمان اشتغلت علية بعضهم نجح وبعضهم خسر وعشان كدة بنقول ان الهيدج مش مجرد مصطلح او كلمة لا خالص الهيدج سلوك فنى واحترافى يعتمد على مهارات فنية لابد من وجودها يعنى مش كل واحد عاوز يتاجر وخايف يعمل هيدج طبعا لا لأنك ببساطة لو مش فاهم ومعندكش مهارة ولا عارف ازاى تستفيد من الهيدج حتخسر
اولا نتكلم عن تعريف الهيدج
انواع الهيدج
كيفياتة الهيدج
مهارات الهيدج
احدث الأستراتيجيات والطرق التى تستخدمها للهيدج
اولا
الهيدج وتعريفة
الهيدج فى معناة انك تفتح صفقتين عكس بعض كنوع من الأمان بحيث تأكد الربح مهما كان السعر وسلوكة لأنك مهما كان السعر صاعد او هابط انت لن تخسر الا عمولة الصفقتين فقط
فى حد معانا بيقول طب وانا استفدت اية من كدة بالعكس انا كدة خسرت العمولة مرتين من صفقتين حقولك اتقل كدة وروح اعمل فنجان قهوة وركز معايا كدة عشان الكلام اللى جاى احنا لسة بنقول ياهادى دة مجرد تعريف بس
طيب نتكلم عن انواع الهيدج
الهيدج ممكن يكون هيدج احادى
هيدج ثنائى
هيدج ثلاثى
طيب حنتكلم اولا عن الهيدج الأحادى اللى هو هيدج عام بتاع الشعب اللى كل الناس تعرفة وهو فتح صفقتين على زوج واحد من نفس نقطة السعر واحد شراء والتانية بيع ودة ابسط انواع الهيدج
طيب هل معنى كدة ان الحكاية بسيطة لا ابدا الهيدج بيعتمد على تحليل فنى محترم ونقاط الدعم والمقاومة والفيبوناتشى من احد اهم الادوات المستخدمة واطارزمنى مناسب انا شخصيا افضل 4 ساعات عشان تبعد عن الدعوم والمقاومات الضعيفة وتكون على افضل ما يكون
طيب ندى مثال عشان الناس تفهم بسهولة
حنشوف فى المثال التالى صفقة هيدج احادى على زوج اليورو دولار مثلا وعلى فريم زمنى 4 ساعات من نقطة 1.15.85 زى مانتوا شايفين وكانت نقطة معقولة
طيب فتحنا نقفل الصفقة امتى وفين ولية
الصفقة قفلناها عند مستوى مقاومة قوية تقريبا 1.1750 يعنى صفقة الشراء اتقفلت
طيب فين المكسب فاضل صفقة بيع انا كدة منتظر السعر ينزل وبقدر الهبوط بيكون المكسب من نقاط الهبوط ودةى بتاعتك انت اقفل الصفقة وقت ما تحب بس طبعا فنيا عند اول دعم تلاقية مناسب وفى المثال هنا نلاقى اغلاق انهاء الصفقة عند 1.1640 يعنى تقريبا 100 نقطة ومبروك عليك الربح والمكسب بدون اى مشاكل او ارهاق وتعب اعصاب وطبعا ممكن يبقى قبل كدة انت براحتك
انت عارف لو كل يوم ممكن تعمل 100 نقطة او حتى نصهم بشكل بسيط بعيد عن شغل الهبش ونظام حرق الأعصاب
http://www.m5zn.com/newuploads/2018/...3273aefb57.jpg
دى كانت اول حاجة معاكم فى نظام الهيدج وكيفية الربح منة ومنتظر تفاعل حضرتكم مع الموضوع عشان نكمل باقى الشرح والربح بأبسط الطرق