Thread: 
Subscribe
هواتف بيكسل الجديدة تعاني من مشكلة بعد تفعيل بصمة الوجه او ال Face ID وهي وانك مغمض عيونك ممكن الجهاز يتفتح بعد التوجيه للوجه ،، قوقل اعترفت بالمشكلة وقالت انها شغالة حاليا علي المعالجة
طبعا الخطورة وانت نائم ممكن بكل سهولة زول/ة يفتح تلفونك ونوم العوافي ياباشا تصحي وتلقي تلفونك بقول ليك معليش زمن الغتغته والدسديس انتهي
- ابل تنتعش من جديد وتتخطي حاجز الترليون دولار وسهم ابل يرتفع ويوصل الي اكثر من 240 دولار للسهم الواحد
هواتف ايفون 11 محققة مبيعات كبيرة جدا ، ابل قررت زيادة انتاج الهواتف بنسبة 10% للاقبال الكثيف علي الهواتف والمفاجأة انه ايفون 11 في الصين محقق مبيعات عالية جدا جدا حتي الان
هل تفعلها ابل وتعود للمركز الثاني في الربع التالت او الرابع من العام ام هواوي ستقاتل من اجل الحفاظ علي المركز
هذا ما سنعرفه قريييبا ايها السادة
- فيسبوك الحوت الازرق رسميا شغال حاليا علي ميزة الوضع الليلي والخيار ظهر لبعض المستخدمين علي الويب ترند ال Dark Mode البدأ مع بداية العام اصبح متوفر علي انستجرام ، تويتر ، قوقل بلي ، واتساب
- من فيسبوك الي مايكروسوفت
اذا وصلك تحديث للويندوز 10 بعد يوم 15 اكتوبر قول ليه معليش يابااا
والسبب انه مايكروسوفت حذرت من التحديث بعد اكتشاف مشكلة بتعطل نظام الامان ATP تبع ال Windows Defender وطبعا دي تسبب ليك مساكل وتخليك تغني ظلموني كتير وتصفق وانت نايم فشنووو اعمل رايح من التحديث وانتظر 15 نوفمبر مايكروسوفت حترسل تحديث جديد وتحل المشكلة
- شمار سريع كدة حصري
يوم الجمعة واتساب اختفي من قوقل بلي فجأة لمدة ساعة ورجع تاني بدون ذكر اي تفاصيل
- اخيرا الصين حيث المليار و400 مليون شخص وقرار جديد من الحكومة الصينية بالزام اي مواطن بأخذ بصمة الوجه وصورة (الوش ) قبل شراء اي شريحة اتصال او تفعيل اي خدمة انترنت
يازول انا حركب راس وما حعمل الحاجة دي
ببساطة شريحتك حتتقفل ماحتقدر تشتري شريحة جديدة وتسجلها وماحتقدر تنشط اي خدمة انترنت تابعة لاي شركة هناك
الصورة والبصمة حتكون محفوظة مع الداتا العندهم عنك
تقدر تقول كدة الحكومة الصينية من يوم تتولد لحدي اخر لحظة في حياتك وهي بتجمع داتا عنك وبتطور في انظمة المراقبة عبر الذكاء الاصطناعي
ده من الاخر ملخص الموضوع وكل مره بتزيد في جودة المراقبة وتعمل علي تحسينها
حاليا من خلال الصورة وبصمة الوجه انت/ي حتتجاب حتتجاب ومع انظمة الذكاء الاصطناعي في الصين كل يوم بتزيد مراقبة اي حركة في الانترنت
قبل ايام المدير التنفيذي لمايكروسوفت اتسأل من مذيع ال BBC ، رايك شنو في التقنيات البتعملها الشركة الخاصة بالذكاء الاصطناعي والصين بتستخدمها ضد شعبها ؟!
الراجل طلع دبلوماسي جدا وقال اي دولة لديها قوانين ونحن بنحترم ده بس كمان بنلزم اي جهة انها تعمل وفق شروط ولوائح خدماتنا وبنحدد من يستفيد من خدماتنا سواء امريكا او بريطانيا او الصين
المذيع اول ما سمع بريطانيا والقناة BBC طوالي خش في السؤال البعديه
كان تسأل تاني عشان يكشح ليك غسيل بريطانيا والبتعمل فيه
يلا شكرا لانك وصلت/ي لهنا ، وان شاء الله تكون استمتعت بالنشرة
ماتنسي تدعمنا بلايك
وكل الحب والاحترام والتقدير لكم جميعا
