Thread: 
Subscribeالسلام عليكم و رحمة الله و بركاته
اخوانى و احبائى اعضاء المنتدى
بداية اود ان اشكر ادارة المنتدى على اهتمامها الكبير بالمواضيع و انها جمعتنا مع بعض فى مكان واحد
انا لا ادعى انى عالم بالفوركس لكنى سأحاول ان انقل ما اعرفه و ما جربته و لمسته و لاحظته من جراء خبرة ان كانت صغيرة لكنها ستفيد عديمى الخبرة و المبتدئين.,
حنتكلم عن مواضيع مهمة جدا لكل مضارب
1- ادارة راس المال
2- التحليل الاساسى
كيفية قراءة الاخبار قراءة جيدة و الاستفادة منها
3- التحليل الفنى
كالرسم و الترندات و الفيبوناشى و الشموع و النماذج.....
4-المؤشرات
و سنناقش انواع المؤشرات و فائدتها و كيفية استعمالها لعشاق المؤشرات و الاستراتيجيات
5-الحالة النفسية
للمضارب و للسوق و كيفية انها سبب كبير للمكسب او الخسارة
لى اكثر من رجاء
1- ان يتمهل الاخوة فى الموضوع فالموضوع حياخد وقت طويل مش فى يوم و ليلة.
2- ان محدش يتكسف انه يسأل عن اى شيئ مهما كان تافه من وجهة نظرة و لكن بعد القراءة الجيدة للمشاركات و الموضوع ككل.
ووطلب بسيط من ادارة الموقع ان لا يتم نقل الموضوع الى القسم التعليمى الا بعد الانتهاء منه على اكمل وجه ان شاء الله.,
ربنا يوفق الجميع و يكرم و احاول انقل معلوماتى اللى جمعتها من سهر و تعب شهور و سنين ان تصل لاخوانى على اكمل وجه.,
اسألكم شيئ واحد فقط مقابل كل هذا
الدعاء
سنبدأ بالنقطة الاولى فى الفوركس و هى:
فن ادارة رأس المال
طبعا زى ما انتم شايفين الاسم فهو فن فعلا
كيف تدير رأس مالك؟
ما هو المارجن,الروافع,احجام العقود....؟
اى واحد فاتح مشروع صغير حتى ولو كشك سجاير محتاج الى ادارة لرأس ماله يعنى مثلا يجيب الاصناف الشغالة معاه,انه ميخزنش صنف يركد عنده و هكذا..
نفس الوضع فى الفوركس و ان كان المجال اوسع و اكبر و اخطر شويتين لازم المضارب يظبط نفسه و نفسيته و بضاعته عشان يقدر يكمل فى السوق
الفوركس هو عبارة عن عمليتين
بيع او شراء
انت عايز تبيع قبل ما السعر ينزل و بكده انت كسبت الفرق او تشترى قبل ما السعر يطلع و كده كسبت برضه,الشطارة بقى انك تعرف امتى حيطلع و امتى حينزل.
اهم حاجة انك لا تطمع فى الربح و لا تترك الخسارة تجرى
و من هنا جت اهم نقطة و هى ادارة راس المال
فى مقولة بتقول انك لو دخلت ب 1% من راس المال على صفقات عميانى يعنى صاحى الصبح و قبل ما تغسل وشك حتى دخلت بيع يورو دولار من غير ما تبص على شارت اصلا و هدف 50 نقطة نسبة احتمالك للهدف هى 50% كاملة من غير ما تعمل شيئ ممكن تصيب و ممكن تخيب
لكن يستحيل انك تخسر 100 صفقة متتالية عشان تصفر طالما انك ملتزم بستوب
و عمرك ما حتخسر راس مالك و ممكن يزيد لو فى توفيق من عند ربنا لكن احنا هدفنا الارباح و التعلم و الخبرة و الاستمتاع بالمضاربة و الوصول للاهداف فهى سنة للحياة و فى طبيعة الانسان.
المهم نرجع تانى لادارة راس المال اولا
اعرف انت حسابك يساوى كام فى السوق يعنى على قد لحافك مد رجليك.
حسابك 500$ يعنى السوق يسحب منك 500 نقطة لو النقطة بدولار
او 1000 لو بنص دولار
او 5000 نقطة لو ب 10 سنتات
طالما انك مبتدئ لازم تدخل بالقليل عشان السوق تقيل و مش سهل و ناس عفية بتروح كل يوم
طيب او عملت خطة بسيطة انك تحقق 50 نقطة كل يوم يبقى حوالى 1000 نقطة فى الشهر و ده شيئ سهل نسبيا بعد التدريب حتجيب 100$ فى الشهر يعنى 20% من حسابك اكيد مفيش بنك او حتى مشروع قوى يديك 20% من حسابك كل شهر
انت محتاج 5-6 شهور عشان تضاعف راس المال و ده شيئ ممتاز كبداية.,
بالنسبة للروافع فهى تحجز لك المارجن المستعمل من حسابك و 1:400 هى جيدة كبداية
حجم العقود احسبه و جرب نفسك على الديمو كتير و متستعجلش فى الفتح فى حساب حقيقى
انا قعدت 8 شهور كاملين على الديمو
لكن عشان لما ابدأ لا اخسر
حتى و ان خسرت اول حساب ده حيعلمك كتير.,
طيب اهم نقط فى ادارة راس المال هى
1-اعرف حجم عقدك لا تضارب بعقود كبيرة نسبيا على حسابك ,السوق قوى جدا و لن تقف انت امامه.
2-لا تضاعف العقود ابدأ مهما ظننت ان الصفقة قوية جدا و بها ربح وفير
3-اعمل خطة و امشى عليها
مفيش شركة او مصنع او حتى محل كشرى مش عامل هدف يوصله و لو مش عامل بيفضل زى ما هو او يفلس
4-الستوب لوز ليس ابدا ابدا شيئ سيئ فهو يبقيك فى السوق,هو صديقك و ليس عدوك لانه طوق نجاتك عندما يعصرك السوق.
5- احسب خسارتك و تأثيرها على الحساب قبل مكسبك دائما
اكيد فى كلام كتير مش حقدر اكتبه فى مشاركة واحدة لكن بيتطلع فى مشاركات و ردود على اسئلة عايز اسمعها عشان الموضوع يفضل شغال.,
معلش للاطالة..
الله كريم.,
---------- Post added at 06:26 PM ---------- Previous post was at 06:26 PM ----------
2- التحليل الاساسى
هو عصب التجارة و الفوركس
هى المحرك الاول لطريق سعر العملة و مهم جدا التعرف عليها.
فى ناس كتير مش بتهتم بالاخبار و بتقراها كأنها بتقرا الجرنان.
على الرغم ان القراءة الجيدة للاخبار شرط اساسى لتكون مضارب ناجح و تربح من الفوركس.
فى السوق هناك اخبار هامة و اخبار متوسطة و اخبار للمدى البعيد و احاديث صحفية و كلام كتير.,
لازم تحدد ايه الخبر اللى نستفيد منه فى مضاربتنا يقولنا وجهتنا عشان الدخول يكون افضل.
مثلا النهاردة فى خبر الفائدة على الباوند و اليورو و اخبار الفائدة من الاخبار الهامة جدا و محركة لسعر العملة على مدى طويل يمكنك منه ان تحدد الترند او الوجهة التى سيمشى فيها السعر.
الباوند متوقع الخفض بمقدار نصف نقطة.,لازم تعرف او اتخفض نصف نقطة يحصل ايه
و لو ربع ممكن يمشى ازاى,و لو اكتر من المتوقع كمان.
الخبر لو وصل زى المتوقع يبقى الفائدة حتقل على الباوند على المدى المتوسط و البعيد يعطى دفعة للاقتصاد عشان مفيش حد بيحط فلوسه فى البنك عشان مفيش فايدة تذكر,لازم تشتغل عشان تكسب و هكذا..
طيب فوركسيا الباوند سيهبط اولا ليبحث عن نقطة قوية ينطلق منها لان الخبر سيعطيه القوة و الملاذ الامن للاستثمارات.
يجب ان تقرا الخبر صحيحا حتى تعرف من اين تبدأ و اين تنتهى صفقاتك.
يجب ان تفهم هل الخبر جيد للعملة ام ماذا..
على المدى الطويل ولا المتوسط
فى نقطة هامة ان احيانا كثيرة الخبر يتشرب من السوق يعنى مثلا يكون خبر سلبى و المضاربين تقراه قبلها بيومين فالكل يدخل بيع للزوج طوال اليومين او الثلاثة السابقين و عندما يأتى الخبر سلبيا تجد العملة تصعد او لا تهبط بالقدر المطلوب لان السيولة استفذت بفعل الخبر من قبل الخبر و حان وقت الخروج لجنى الربح.,و يصعد الزوج و انت بتتفرج!
لازم تحاول تشوف الخبر اتشرب من السوق ولا لأ
مثلا خبر متوقع سلبى هام جدا على الباوند لقيت اليومين السابقين الباوند بيهبط بقوة لغاية الخبر و الخبر طلع سلبى فعلا انتظر كسر مستويات قوية حتى تتأكد من الهبوط.
لا تجعل السوق يخدعك و كن حريصا.
عيب الاخبار اللى واجب تجنبه انك لا تضارب وقت الاخبار
حاول الخروج قبل الخبر لان ساعة الخبر و بالذات لو عكس المتوقع ستجد حالة هرج فى السوق لفترة قليلة
ممكن فى هذه الفترة يؤكل ربحك بالكامل و يضرب ستوبات بسبب الذيول الطويلة لان هناك مضاربين تخرج بكثرة و اخرين يدخلون بكثرة بفعل الخبر عشان كده السعر بيبقى طالع نازل.
عامة علاقتك بالاخبار لازم تكون جيدة و تتعلم على الديمو الاخبار باللون الاحمر بتأثر ازاى فى حركة الشارت.
كلام كتير فى الاخبار و قرائتها يصعب ان نذكرها فى مشاكة برضة.
فى انتظار تعليقات و استفسارات.
و فى انتظار..
و المزيد من..
الدعاء..
الله كريم.,
---------- Post added at 06:27 PM ---------- Previous post was at 06:26 PM ----------
التحليل الفنى
بسم الله العلى القدير نبدأ مع التحليل الفنى الذى سيطول شرحه ان شاء الله
الله يقوينى على الكتابة و الشرح و يقويكم على الفهم.,
كنا اتكلمنا المشاركات السابقة عن التحليل الاساسى و ادارة رأس المال و عرفنا اد ايه هم مهمين لاى مضارب يريد ان يكون ناجحا
و عرفنا انهم من اعصاب العمل الفوركسى الرئيسيين
لكن الان مع التحليل الفنى
و هو العمل الفوركسى نفسه
تحديد نقاط الدخول و الخروج
بالعربى هو ده اكل العيش و التجارة بالعملات
من غير تحليل فنى ستخسر رأس مالك حتما لان السوق سيبتلعه
من غير تحليل فنى لن تحافظ على نفسك من الخسارة
من غير تحليل فنى مش حتكسب ابدا!
تقولى توصيات اقولك انسى طالما انت مش فاهم ليه دخلت التوصية يبقى حتخسر لا محالة.
التحليل الفنى يتضمن اكثر من شيئ و اهمهم
-القمم و القيعان و الترندات المتكونة
-القنوات السعرية
-الشموع و انواعها
-النماذج السعرية
-التحليل الفنى النفسى للعملة
ان شاء الله احاول اضيف شارتات لما سبق اثناء الشرح عشان المعلومة توصل كويس ان شاء الله.,
فاصل لنترك فرصة لاضافات الاخوة قبل البدء.,
