سلام عليكم غير واحد لفترة قريبة بزاف كنا فين ما كنسمعو شي بياسة من شينوا كنقولو أتوماتيكيا بلي هي عيانة و ماشي دورجين ، وغالبا كتكون فوطوكوبي ديال شي ماركة معرفوة بحال أديداس و نيك و بيما ... إلخ لي معرفين بلجودة لعالية لمنتوجات لي كيقدمو .
ولكن بغينا ولا كرهنا لمنتوجات صينية غادا وكتطور و حتى شركات ديالهم ولو منتشرين فأغلب الأسواق العالمية بحال (Huawei وXiami)
غادي نهدرو على لمنتوجات التقنية كلهواتف مثلآ ، كاينين شي هواتف لي لجودة ديالها واعرة وواعرة بزاف و كتساوي لجودة ديال تليفونات ديال شركات عالمية كبرى بحال سامسونغ و أبل ولكن كاين فرق فثمن ديالهم ، بحيث كنلقاو لهواتف صينية فلحالة طبيعية رخيصة على لهواتف ديال شركات لكبيرة بنسبة كتوصل لحتى 20% ، علاش ؟
- يد لعاملة :
فصين عندهم يد لعاملة رخيصة مقارنة مع لبلدان لي كتواجد فيها مصانع شركات لكبرى بحال أمريكا ، هد شي لي كيخلي شركات صينية كيوفرو واحد لقدر كبير ديال لمال لي كيكون عامل فثمن رخيص للمنتوج لي كيقدموه .
- تسويق:
إلى درنا واحد لمقارنة صغيرة بين شركات لكبار بحال أبل وسامسونغ و سوني لي كيصرفو عشرات لملايين ديال دولار فإستقطاب لمشاهير فلإعلانات ديالها و باش يبانو لمنتوجات ديالها فلأفلام لكبار ، فيما كنلقاو شركات صينية كتقوم بحملات تسويقية صغيرة و غالبا كتكون ناجحة بشكل كبير .
- إستغلال لأنترنت :
كنلقاو شركات لعالمية لكبار كيبنيو فروع للمراكز البيع و صيانة ديال لأجهزة ديالها فڭاع بلدان العالم و بطبيعة الحال هدشي خاصو ميزانية كبيرة و كبيرة بزاف ، لكن شركات صينية كتعتمد بشكل كبير على لأنترنت فبيع لمنتوجات ديالها فلعالم كلو بلاما تحتاج لمراكز لبيع و دكشي ، هدشي لي كيتيح ليها توفر واحد لقدر هام ديال لعاقة لي كتستغلها فتخفيض ثمن ديال لهواتف ديالها .
- بيع لملحقات :
كتبيع شركات صينية ڭاع أنوع لملحقات الخاصة بلهواتف بحال سماعات و شارجور و لبطاريات وعصى ديال سيلفي ... إلخ ، هد لملحقات كتربح منها شركات صينية مبالغ كبيرة وهدشي كيشجعها باش تبيع لهواتف ديالها بثمن قليل من لمنافسين ديالها..