خطتك لاداره رأس مالك

[elsiafy1]

الفكرة هنا ان النجاح في الفوركس
80% ادارة راس مال+ نفسية
20% استراتيجيك في الدخول

وفعلا انا مكنتش مصدق الكلام ده لكن هو فعلا الحقيقة
انت ممكن تبقي كسبان 20% من صفقاتك
يعني كسبان صفقتين وخسران 8 وتطلع كسبان بادارة سليمة اللي هنقولها وهنشوف المثال ده في الشرح
وممكن العكس تبقي كسبان 8 وتخسر 2 بلوت عالي بسبب الطمع وتلاقي نفسيتك ادمرت وبوظت الدنيا
وخسرت اكتر من مكسب ال8 صفقات وممكن توصل للمرجنة لا قدر الله


انا لما جيت احقق معادلة الادارة والنفسية اللي قولناها فوق
لقيت ان النفسية اهم شوية من الادارة لان فعلا فكرة انك تبقي شغال رايق وبنسبة بسيطة من حسابك وعارف انك مهما خسرت هتكسب في الاخر هي دي مربط الفرس

الخطة كالتالي
فكرة تدبيل الحساب عن طريق 5 صفقات متتالية جميلة جدا ولكن تطبيقها صعب نفسيا جدا (بتكلم بشكل شخصي) انك تفضل 5 صفقات بيطلع عينك في التحليل ولما تكسب الاولي تتاجر بربح التانية وهكذا لغاية الخامسة
نفسيا بيخليك فعلا علي اعصابك جدا وعن تجربة

فنا عدلت شوية في الطريقة بحيث انك عندك كذا خطة للتدبيل
حسب نفسيتك

وهي هتكون 8 صفقات(متقسمة علي اربع مراحل)
ولكن بطريقة تخليك نفسيا مرتاح جدا (مخاطرة الصفقة 2% فقط)

لغاية 3 صفقات بس للتدبيل لو انت بقي عايز تجازف ودي برضه براحتك(مخاطرة الصفقة 6 % فقط )


شروط جميع الخطط
1/ نسبة الربح للخسارة 3:1 وهنقول حل للي مش عارف يوصل للنسبة دي

2/الالتزام التام بالخطة وعدم الخوف او الطمع

نيجي لاول خطة المريحة نفسيا جدا
اللي هي 8 صفقات للتدبيل(مقسمة علي اربع مراحل)

انت هتدخل اول صفقة 2% من الرصيد (قمة المحافظة علي راس المال)وطبعا بعد تحليل السوق بطريقة تحليلك اللي تكون متقنها
وليس عشوائيا لاننا عارفين اننا في سوق احتمالات وكل ما تحلل صح انت بتزود
احتمالية الوصول للهدف اكتر

يعني لو 100 $ المخاطرة 2$ وتحسب اللوت طبعا حسب نقط الستوب اكيد كله عارف
الطريقة واللي مش عارف يقولي وهقوله ازاي يحسبها

الهدف للستوب 3:1
يعني الخسارة 2%
والمكسب 6%

بفرض انك ربنا يسرلك وكسبت صفقتك
نيجي للصفقة التانية هتدخل بمكسب الصفقة دي لمرة واحدة فقط
بمعني هتدخل بمكسب الصفقة دي اللي هي 6$ لو حسابك كان 100$
وبرضه الهدف 3 اضعاف الستوب

يعني الخسارة 6%(اللي هما مكسب الصفقة السابقة وبكده راس مالك مازال في امان)
والمكسب 18% وبكده خلصت المرحلة الاولي من الاربع مراحل شكرا
انت كده معاك 24 % ربح يعني ربع حسابك مكسب من صفقتين وهنرجع نعيد من الاول
بحسبة 2% من الرصيد الجديد ونكررها اربع مراحل يبقي كده انت دبلت حسابك بتمن صفقات

مميزات الخطة
1/ انت في قمة الامان النفسي والسبب هو انك
كل متاجرتك في صفقاتك عموما ب 2% من حسابك
وطبعا دي نسبة قليلة جداااااااااااااااااااااا علي انك بتجازف ب 2% من حسابك
عشان تكسب 25% من حسابك(ربع الحساب في صفقتين)

2/ المرحلة الوحيدة اللي هتحس فيها ان نفسيتك مش مرتاحة هي مرحلة الصفقة اللي بالربح
ودي حالة مؤقتة هتروح مع الوقت والتعود ولكن عايزك وانت في المرحلة دي
تحط في بالك ان حسابك في امان يعني لو خسرت الصفقة دي
انت فلوسك في امان تام وبتتاجر بالارباح لمرة واحدة بس وليه بنقول مرة واحدة بس
مع ان خطة التدبيل اربع مراحل يعني اربع مرات هنعمل الحركة دي
لانك بكل بساطة لو جيت حسبتها علي 10 صفقات لو انت كسبت الصفقتين المتتاليتين دول
وخسرت بعدها 8 صفقات بحالهم
احسبها كده
8 صفقات خسارة(16% خسارة)
صفقتين مكسب متتاليتين( 24% مكسب)
بشرط طبعا نسبة الهدف للخسارة 3:1
يعني نسبة نجاح صفقاتك 20% وطلعت كسبان برضه
مع العلم ان حركة المجازفة بالربح لمرة واحدة فقط هي اللي خلتك طلعت ربحان
لان في الحالة العادية لو كنت كسبت نفس عدد الصفقات(صفقتين مكسب) بنفس نسبة الربح للخسارة 3:1
كانت المحصلة هتكون خسارة
8 صفقات خسارة(16% خسارة)
صفقتين مكسب (12% مكسب)
المحصلة خسارة 4%
وحتي لو ده حصل وده طبعا هيدل ان طريقتك غلط او انك بتعمل حاجة غلط اكيد او عشواءي
لكن طلعت ربحان بالادارة السليمة وتقدر بعد الخساير دي كلها تستمر في السوق
لان مش شرط الخطة صفقاتك ال8 تكون متتالية انت ممكن تكسب 24%
في الصفقتين وتلاقي شوية خساير طبعا وارد بس عشان تخسر ارباحك دي
محتاج خسارة 12 صفقة متتالية
شايفين اد ايه النفسية في السما بعد مكسب صفقتين فقط متتاليتين

وطبعا حتي بعد الخساير دي كلها مجرد ربحك لصفقة واحدة بتعيد الخطة تاني
وتدخل بارباحها لمرة واحدة فقط وتعوض كل اللي فات من خسارة بارباح اعلي كمان

واظن مش صعبة انك تكسب صفقتين ورا بعض دنتا حتي لو شغال عشوائي
ممكن تعمل كده

وطبعا اللي عايز يخلي التدبيل بدل 8 صفقات يخليها 6
او 4 او 2
هيعلي نسبة المجازفة في الصفقة
يعني الخطة الاولي السابقة
مجازفة 2% للصفقة (8 صفقات للتدبيل)
(6%+ 18%=24%) دي مرحلة من صفقتين هتكررها اربع مرات=96%

الخطة التانية
مجازفة 3% للصفقة (6 صفقات للتدبيل وزيادة )
(9%+ 27%=36%) دي مرحلة من صفقتين هتكررها تلت مرات=108%


الخطة التالتة
مجازفة 4% للصفقة (4 صفقات للتدبيل)
(12%+ 36%=48%) دي مرحلة من صفقتين هتكررها مرتين =96%

الخطة الرابعة
مجازفة 5% للصفقة (4 صفقات للتدبيل وزيادة اوي )
(15%+ 45%=60%) دي مرحلة من صفقتين هتكررها مرتين =120%

الخطة الخامسة والاخيرة
مجازفة 6 % للصفقة (3 صفقات تقريبا للتدبيل)
(18%+ 54%=72 %) دي مرحلة من صفقتين
ومع الصفقة التالتة العادية اللي ب6 % من رصيدك الاجمالي
الاجمالي 72+18 = 90 %
يعني تقريبا 3 صفقات
ملاحظات مهمة واخيرة في الموضوع

1/ اختار الخطة اللي تناسب نفسيتك وانت بتتاجر
بمعني متبقاش بتتاجر وانت بتعض علي ضوافرك وخايف
هدف ادارة راس المال هي انك تكسب بدون ضغط نفسي ورصيدك الاصلي يكون في امان
وتكون بتتاجر بس بالربح لصفقة واحدة فقط ولازم تعود نفسك علي النفسية العالية في المتاجرة

2/ عدم ترويض النفس البشرية يعني هلاك حسابك
نفسيتك اهم عنصر في الفوركس بدون النفسية العالية هتلاقي نفسك
لو اعظم محلل في العالم هتلاقي نفسك بتقفل صفقات بدري قبل الوصول للهدف
بتبعد الستوب كل ما يقرب السعر منه بحجة انه هيرجع للهدف وبحجة ان السوق في حد بيخسرني وبيعكس عليا السعر بتصبر علي الخسارة لكن الربح لا
دي خطوات الفشل في الفوركس


3/ اشتغل بمبدا كان ده مش حسابك
يعني ده حساب لصديق او حد تعرفه بيقولك اعمل كذا وكذا
وهيحاسبك علي كده يعني بيقولك حدد المكان الدقيق للستوب
وخلي الهدف اكبر من الستوب وتسيب الصفقة تعيش حياتها
يا تضرب الهدف او وقف الخسارة اوعي تغير في ارقامها خاااااااااااااااااااااااا ااااالص
تقرب الستوب للدخول وتحجز ارباح فقط فقط فقط فقط
لكن تبعد الستوب او تقفل علي هدف قريب مرفوووووووووووض عشان تقدر تتعود علي الصح


4/ الحل بتاع نقطة
الهدف 3 اضعاف الخسارة اللي قولنا فوق هنقول حلها
حلها بسيط جدا انا مثلا لو هتكلم بشكل شخصي في ورشتي اللي في التوقيع
وهي الترند المكسور بتحليل كلاسيكي بحت
بعمل ايه اهم حاجة الستوب بحدده كويس جدا فوق مقاومات وموفنجات وحاجة قوية
كانك بتخبي حد هربان ومش عايز حد يمسكه هههههه
بفرض طلع الستوب المناسب ده 100 نقطة اي كان الرقم يعني
بحط الهدف 3 اضعاف حتي لو شايف ان الهدف قدامه حاجات تعوقه
مربط الفرس في الترند انك بتستني كسر لاخر منطقة دعم او مقاومة في ظل الترند ولو حد عايز يفهمها يدخل الورشة عندي بوضحها في الفرص
فبالتالي الكسر بيكون قوي لانه الترند من الاصل تصحيح لفريمات الشهري والاسبوعي
فنتا مع صناع السوق
لو هتكلم بشكل شخصي الاستراتيجية ناجحة بنسبة كبيرة فبستني الكسر للمناطق المهمة بعد كسر الترند للتاكيد وبتوكل علي الله وبدخل
الملخص هنا في النقطة دي مش عرض طريقتي وخلاص
انا عايزك تشوف صناع السوق بيفكروا ازاي وامشي معاهم
انت ممكن تكون شغال باستراتيجية مفيش ابسط منها
مثلا موفنج 200 بعد كسره بتدخل
ولكن انت بتحطلها شروط واضافات تخليك متدخلش غير بعد كسر حاجات كتير
او برايس اكشن في شارت فاضي بس بتعرف تدخل وتخرج
حط شروط بتخلي استراتيجيتك اقوي

حط بصمتك عشان توصل لوحدك
لو الورش هنا هدفها نساعد بعض
لكن عمرها ما هتتاجر مكانك
ولا تعلي نفسيتك
ولا تخليك تدير حسابك صح

من الاخر لو انت شغال علي طريقة الهدف قد الستوب مثلا
خليها اكبر ومتخافش انت مجرد ما يتحرك السعر في اتجاه صفقتك احنا في سوق بيقوم علي علم الاحتمالات مرة هيضرب ستوب ومرة هيجرررررررررررررررررري في اتجاه ارباحك

حرك الستوب للدخول وسيبها تعيش حياتها
لو ضربتلك ستوب الدخول في غيرها كتير السوق مش هيخلص
لانك لازم تستفيد بتحرك السعر في اتجاه صفقتك كل ده ربح ضايع
ولكن اذا ضرب الستوب من البداية مش مشكلة هتشوف برضه غيرها لانك ماشي بادارة راس مال ونفسيتك كويسة

5/ عود نفسك علي تقبل الخسارة وتحط في بالك انك خسرت النهارده
هتكسب بكرة او بعده او بعد اسبوع
(ادارة راس المال والنفسية اهم من الدخول زي ما قلنا)