مراجعة Xiaomi Redmi 9

[afaf mahmoud]

التصميم
موبايل Redmi 9 جاي بخامات من البلاستيك بالكامل .. وده طبيعي في الفئة السعرية ديه .. لما تبص على الظهر من بعيد هتحسه Note 8 Pro في نفسه كده .. لانه واخد نفس طابع التصميم الخلفي وشكل رصة الكاميرات الخلفية.

وبالمناسبة الكاميرات الخلفية هنا بروزها صغير اوي .. وكمان الجراب المُرفق في العلبة بيغطي البروز الصغير ده
تصميم الظهر عليه نقشة خفيفة كده .. لما تمشي صباعك عليه بتسمع صوت كده .. علشان يبقى مقاوم أكتر للخرابيش والكلام ده
وبالنسبة للوزن والأبعاد فا الموبايل بيجي بوزن 198 جرام وتخانه 9.1 ملم .. مش صغير ومش كبير .. بس اللي لاحظته فيه توزيع الوزن كويس جدًا ومش هيحسسك إنك شايل موبايل تقيل في إيدك.
الشاشة
شاشة كبيرة بتيجي بحجم 6.53 بوصة من نوع IPS LCD وبدقة FHD+ .. اخيرًا في الفئة الإقتصادية موبايل بشاشة محترمة في الفئة دي.

الشاشة طبعًا واخدة الشكل القديم النوتش الـWater Drop .. ومفيش مشكلة من الموضوع ده علشان يسيبوا شكل الثقب للموبايل الأغلى منه واللي هو الـRedmi Note 9.
تقدر تلغي شكل النوتش من الإعدادات لو حابب .. والشاشة عليها طبقة حماية Corning Gorilla Glass الجيل الثالث والموبايل كمان جاي في العلبة متركب عليه سكرينة.


الأداء

بإختصار .. موبايل Redmi 9 فيه أقوى مُعالج في الفئة السعرية اللي تحت 2500 جنية وهو الميدياتيك Helio G80 .. محقق أعلى سكور في Antutu تقريبًا في الفئة ديه

بالنسبة للأداء الرسومي لعبة PUBG بتشتغل على اعدادات جرافيك High HD واللعبة بتشتغل كويس جدًا .. ولعبة Call Of Duty اشتغل على اعدادات جرافيك Low وده الطبيعي من المعالج ده .. ومع ذلك اللعبة بتشتغل كويس جدًا.

عوامل الأمان وعناصر اخرى

الموبايل جاي بواجهة شاومي الـMIUI 11 مش الـ12 .. والموبايل اكيد هيجيله الـMIUI 12 .. الـDark Mode موجود في الموبايل ده وشغال كويس جدًا .. والموبايل مفهوش لمبة إشعارات للأسف زيه زي الـRedmi Note 9.

بس فيه مايكروفون إضافي ومستشعر IR Blaster موجودين في الطرف العلوي للموبايل .. المستشعرات كلها موجودة وشغالة بدون مشاكل، الضوء والتقارب والبوصلة.

صوت الـRedmi 9 .. فلتة في فئته السعرية .. أعلى وأحسن صوت .. وصوت سماعات المكالمات عالي .. ومُمتاز وصوت سماعات الأذن مقبول جدا.

البطارية

بطارية ضخمة بتيجي بحجم 5000 مللي أمبير .. إستحملت معايا حوالي 8 ساعات شاشة مفتوحة .. وطبعًا ممكن تزيد على حسب إستخدامك.

الكاميرات

الموبايل جاي بـ4 كاميرات في الظهر .. الأساسية 13 ميجا بيكسل فتحة عدسة ضيقة شوية F/2.2 والعدسة التانية 8 ميجا بيكسل فتحة عدسة F/2.2 للتصوير الواسع .. والتالته 5 ميجا بيكسل ماكرو فتحة عدسة F/2.4 والأخيرة 2 ميجا بيكسل للعزل.

السيلفي بيجي بدقة 8 ميجا بيكسل بفتحة عدسة F/2.0 وهو موجود في نوتش الشاشة.

الرأي النهائي
مميزات Redmi 9 :-



اقوى أداء بأفضل معالج في الفئة دي
أعلى دقة شاشة متوفرة
بطارية قوية تدعم الشحن السريع
أقوى صوت في الفئة دي
مستشعر IR مع دعم ميكروفون اضافي لعزل الضوضاء
عدسة كاميرا خلفية مخصصة للتصوير الواسع

عيوب Redmi 9 :-



سطوع شاشة قليل
مفيش لمبة اشعارات
الكاميرا الخلفية مش الأفضل مقارنتا بـ ريلمي C3

[saadashraf14]

السلام عليكم ورحمه الله وبركاته. اخى الفاضل احيك على نشر هذا الموضوع المتميز بخصوص موبايلات شاومى فشركة شاومى شركة عملاقه بصراحه فى انتاج الهواتف الذكيه شركة محترمه جدا من حيث الخامات والاسعار والمصداقية وكل شىء اطلقت الشركة هاتف شاومى ريد مى 9 فى شهر يوليو 2020 ويستهدف الهاتف الفئه المتوسطه او الأقل منها وياتى الهاتف بمواصفات جيده جدا وهى كالتالى
_ الخامات التي تم استخدامها في تصنيع الهاتف تأتي من البلاستيك
_ ياتي الهاتف مع شاشه من نوع IPS LCD بشكل النوتش بمساحة 6.53 إنش بجودة الـ FHD+ بدقة 1080×2340
_ ياتى الهاتف مع ذاكره عشوائيه 3 جيجابايت رام مع وجود نسخه اخرى 4 جيجابايت رام
_ كما ياتي بذاكره التخزين 32 جيجابايت مع ذاكره تخزين نسخه اخرى 64 جيجابايت
_ هاتف شاومي ريدمي 9 ياتي بمعالج من ميديا تيك من نوع Helio G80
_ الكاميرا الأمامية للهاتف تأتي بدقة 8 ميجا بكسل
_ والكاميرا الخلفية تأتي بكاميرا رباعية بدقة 13 ميجا بكسل و8 ميجابكسل و 5 ميجا و 2 ميجا بكسل
_ ويدعم الهاتف لخاصية الـ OTG
_ ياتى الهاتف مع مستشعر البصمة ويأتي في ظهر الهاتف كما يدعم خاصية الـ Face Unlock
_ البطارية تأتي بسعة 5020 مللي أمبير مع شحن سريع بقوة 18 واط
_ يأتي الهاتف مع نظام اندرويد 10 مع واجهة شاومي الـ MIUI 11
الهاتف فى المجمل هاتف ممتاز جدا وإمكانياته جميله جدا فشركة شاومى شركة تستاهل الوضع اللى هيا وصلتله لحد الان هيا ضمن أفضل ثلاثة شركات حول العالم فى تصنيع الهواتف الذكية. تقبل مروري وتحياتى وآلله الموفق