مراجعة حول امتي يكون البروتين سواء أكل أو مكمل ضار؟
الأول بس تعالى أقولك أن البروتين من كتر أهميته للانسان فهو أصلا أساس كلمة بروتين protein جاية من Greek اللى هي كلمة protos ودي عندهم معناها First يعني رقم 1 أو تعبير عن مدي أهميته في غذاء الانسان عموما.
طيب امتى بقى الترابيزة تتقلب على الانسان ويبقى الشيء اللى اهم حاجة ليه يسبب ليه ضرر ومشاكل صحية؟
تعالى أقولك باختصار
لو أنت شخص مش رياضي ومعدل نشاطك اليومي مش محتاج بروتين زيادة.
أو عندك مشاكل في الكلى أو الكبد، أو أمراض قلبية، أو النقرس لارتباطه ببعض الأنواع للحوم مثلًا.
بمعني؟
يعني لو زيادة عن سعراتك وأنت شخص مش بتمارس أنشطة بتتطلب زيادة احتياج للبروتين، هنا بس وقتها ممكن يسبب ليك البروتين الزيادة مشكلة سواء تحميل زيادة على kidney الكلى وممكن الكبد ويعمل مشاكل لقدر الله زي kidney stones or heart disease حصوات على الكلى وساعات بتوصل ل cancer في القولون لو نوع البروتين لحوم حمراء وفيها دهون مشبعة كتير مثلا.
فأنت لو شخص مش رياضي فكمية البروتين اليومية ليك اللى بيتوصى بيها حوالى 0.8 grams لكل كيلو في وزنك تقريبًا وممكن تزيد شوية بسيطة أو تعلى على حسب السن والنشاط وهكذا يعني قول مثلا من ٤٠ ل ٦٠ جرام بروتين في اليوم فهتبقى كويسة في معظم الأوقات.
طب لو شخص رياضي؟
معاك معدل بروتين بنسبة تتراوح من1.2وبتوصل ل ٢ جرام وأكتر في وزنك وانت هنا كدة في منطقة الأمان وضمان نتيجة ممتازة مع التدريب. وممكن كمان النسبة تزيد لحد 2.2 مثلا لو تمارينك قوية وأداءك عالى جدًا!
كمان من أضرار البروتين التانية لو زاد عن معدله الطبيعي من غير حساب أنه يكون زيادة عن معدل سعراتك برضو وانت شخص مش رياضي ف برضو يترسب في الجسم على هيئة دهون زيادة و وزنك هيزيد عادي جدًا زي ما بتاكل كاربوهيدرات او دهون نفسها عادي خالص برضو.
كمان البروتين مهم جدا جدا لشخص عاوز يزود معدل الحرق بتاعه او ينشف أو يخس يعني في دراسات كتير وأنظمة دايت قايمة على الموضوع ده بالأساس وهو أنه يزود معدل البروتين في النظام عشان يساعدك أكتر في النقطة دي.
والأهم أنك تختار نوع البروتين الأفضل في قائمة أنواع البروتينات في نظام أكلك.
طب لو عندك أي مشاكل في الكلى أو الكبد أو أعراض أمراض قلبية؟
لازم تراجع طبيب مختص وتشوف المعدل المسموح ليك ايه؟ عشان ميسببش أي مشاكل ليك طبعًا.