Thread: 
Subscribeمراجعة حول سكر الSucrose وسكر الفاكهة
هنحكى الحدوتة من البداية ؛ الموضوع بدأ مع سكر الSucrose اللى هو السكر العادى اللى بنستخدمه وعن أضراره للصحة العامة وزيادته ممكن تخليك عرضه لمرض السكرى ؛ ودا سكر ثنائى بيتم تكسيره ف الأمعاء لنوعين من السكر الأحادي ؛ اللى هو الجلوكوز والفركتوز ....
بعد كدا بيتم نقل السكر الأحادي الجلوكوز و الفركتوز للكبد ؛ وبيتم التعامل مع الجلوكوز عن طريق الكبد ؛ بإنه بيستخدم كمصدر طاقة بشكل مباشر ؛ أو يتم تخزين الفائض منه على هيئة جليكوجين ؛ إنما مع الفركتوز بيكون الموضوع معقد شويا .....
الفركتوز أو سكر الفاكهه من اسمه ؛ دا السكر الموجود ف الفواكه ؛ ومن هنا ارتبط الجدل بين الفركتوز وأضراره وربطوه بالفواكه ؛ ولكن السؤال المهم هل الفركتوز الموجود ف الفاكهه مضر فعلا ؟!
خلينا نقول معلومة واضحة بالأرقام أنت كشخص طبيعى مفيش عندك مشكلة لو دخلت جسمك ٥٠ جرام فركتوز بشكل يومى ؛ ولو زادت الكمية شويا لو حد رياضى مفيش عندك مشكلة ؛ ٥٠ جرام فركتوز دا معناه إنك تاكل كيلو تفاح يوميا
التفاحة الكاملة فيها حوالى ٢٠ جرام سكر منها ١٠ جرام فركتوز
يا صديقى مفيش أى مصدر غذائى ربنا خلقه مضر ليك ؛ احنا كبشر اللى بنتدخل ونعدل ف المصادر الغذائية ؛ وبتفقد قيمتها وبتزيد أضرارها لجسمك .....
الفواكه غنية جدا بالألياف اللى بتقلل عملية الامتصاص ومنه كمان بتقلل التحميل على الكبد من الفركتوز ؛ بالاضافة كمان إن سكر الفركتوز اللى ف الفواكه قليل ......
الفواكه بتساعدك لو بتخس ؛ لو أكلتها قبل وجبتك بشويا ؛ لأن سعراتها قليلة وبتقلل الجوع .....
لما تعمل دايت اتعامل مع جسمك بذكاء ؛ وازاى تقدر تستفيد من مصادر الأكل لصحتك ولجسمك أقصى استفاده من غير ما يكون فيه ضرر من أى حاجه زايدة عن المسموح .
