مراجعة حول حرق السعرات ولا حرق الدهون :
بفرض إنك داخل مشروع استثماري ومطلوب منك تسدد مبالغ قيمتها مليون جنيه وعندك أملاك قيمتها مليون ونص جنيه
متوزعة ما بين حساب جارى ف البنك ٥٠٠ ألف جنيه ( الجيكوجين المخزن ف الكبد والعضلات )
و ٥٠٠ ألف وديعة مش هتعرف تكسرها غير بعد سنة وبتديك أرباح شهرية مثلا ٥٠ ألف جنيه( الدهون المختزنة ف الجسم )
و ٥٠٠ ألف على هيئة شقة تمليك (العضلااااات )
قدرت تسدد ٥٠٠ ألف من المبلغ المطلوب منك عن طريق الحساب الجارى( اللى هو الجليكوجين) وباقى عليك ٥٠٠ ألف كمان ...
لو افترضنا إنك أصحاب الفلوس ضغطوا عليك وعايزين الفلوس ضرورى وانت معندكش سيولة وف نفس الوقت أرباح الوديعة مش هتكفى ( الدهون ) هتبدأ تتوتر وهتفكر تبيع الشقة ( العضلات)بسعر أقل من قيمتها عشان تبيعها بسرعة ويبقى معاك سيولة وف نفس الوقت تكمل من أرباح الوديعة
لكن لو ال ٥٠٠ ألف لو فيه فترة سماح لمدة طويلة شويا هتقدر تسدد من أرباح الوديعة وهتحافظ على شقتك ومش هتخسر ....
دا بالظبط اللى بيحصل مع تمارين متوسطة الشدة أو عالى الشدة ف حالة استخدام مصادر الطاقة
هنقول إنك بتجرى على التريد ميل لمدة ساعة على سرعة ٦ ( تمرين متوسط الشدة ) هتلاقى ظهر على الشاشة إنك حرقت تقريبا ٣٥٠ ل ٤٠٠ كالورى .
ولو افترضنا إنك غيرت السرعة وجريت على سرعة ١٥ مثلا لمدة ساعة ( تمرين عالى الشدة ) هتلاقى ظهر برضو على الشاشة إنك تقريبا حرقت فوق ال ١٠٠٠ كالورى .
ف كلتا الحالتين تم حرق دهون وبنسبة مش قليلة بس بتختلف نسبية اعتماد الجسم على الدهون كمصدر للطاقة على حسب شدة التمرين وطبيعة أكلك ...
ف بداية التمرين لو أنت بتجرى على سرعة ٦ مثلا على التريد ميل بيبدأ الجسم يستهلك جلوكوز الدم كمصدر جاهز للطاقة ؛ وفى المقابل بيحصل تكسير للجليكوجين المخزن ف الكبد لإمداد الدم بجلوكوز للحفاظ على معدله ف الدم
ف نفس الوقت بيبدأ الأكسجين على أكسدة الدهون وتكسيرها لاستخدامها كمصدر طاقة وخصوصا إنه مصدر غنى بالطاقة
بس العملية دى بتكون محتاجة شوية وقت وأكسجين كفاية لتكسير الدهون .
طب ايه اللى بيحصل ف تمارين عالى الشدة زى الجرى على سرعة ١٥ متواصل على التريد ميل :
ضربات قلبك بتزيد جدا جدا عشان تضخ دم كافى لتغذية الجسم ؛ وف نفس الوقت الرئتين بيشتغلوا بأعلى كفائة عشان يقدروا يستوعبوا أكسجين كفاية للجسم وبتفضل تنهك : بس للاسف كمية الأكسجين مبتكونش كافية لتكسير الدهون ؛ وف نفس الوقت الجسم تحت مجهود رهيب ومحتاج طاقة فبيبدأ يتجه للبروتين وتكسيرها واستخدامها كطاقة
وبالتالي بتخسر من وزنك عضل ودا غير محبب لمعظم الناس طب ايه الأفضل :
* إنك تنوع ما بين تمرين عالى الشدة لمدة ٣٠ ثانية مثلا مع تمرين متوسط لمدة ٤ دقايق ؛ بتدى فيهم فرصة لجسمك يهدى ويقدر يستوعب كمية أكبر من الأكسجين لتكسير الدهون