Thread: 
Subscribeمراجعة حول دايت PSMF
دايت عالى البروتين أو دايت المواقف الصعبة فعال جدا جدا ف نزول الوزن بصورة عالية على المدى القصير ؛ وبنلجأ ليه لو حد عايز يخس ف وقت قصير ودا ف الغالب للاعيبه المرتبطة بميزان ف بطولات والوقت مش ف صالحها ....
الدايت دا قليل جدا ف السعرات من ٨٠٠ ل ١٠٠٠ كالورى معظمها من البروتين ؛ ويفتقر للكارب والدهون .....
مصادر الكارب والدهون ف ال PSMF مبتكونش بشكل مباشر ؛ بمعنى بيكون مصادر الكارب الخضروات زى الخيار والخس والبروكلي ؛ والدهون بتكون المتواجدة مع مصادر البروتين العالية ، زى صدور الفراخ او الرومى أو اللحوم الحمرا والجبن القريش قليل الدسم ....
مصادر البروتين ف PSMF لضمان نجاحه بتكون من بياض البيض ؛ الألبان خالية أو قليل الدسم أو صدور الفراخ واللحوم الحمرا وزى ما ذكرت ف النقطة اللى فوق بنكتفى بالدهون القليلة المتواجدة مع البروتين دا ......
الPSMF عكس المتعارف عليه ف الدايت التقليدى ؛ بنزود الملح جدا فوق ال ٥ جرام عشان تعوض الفاقد من الصوديوم الدايت دا زى ما اتفقنا قليل جدا ف السعرات ؛ فضروري جدا تعوض جسمك بالمالتى فيتامين ؛ بالاضافة للبوتاسيوم والماغنسيوم والكالسيوم والصوديوم بشكل يومى ؛ كمان هتزود الميه جدا ....
يفضّل كل أسبوع أو أسبوعين يبقى فيه يوم Refeed بتزود فيه الكارب بصورة عالية وتقلل فيه الملح عشان جسمك ميحبسش ميه ....
الدايت دا على أد ما نتايجه هايلة جدا على المدى القصير ؛ إلا إنه قاسى جدا ويفتقر لمعظم العناصر اللى جسمك محتاجها ؛ ولو سيبته فجأة للاسف جسمك بيزيد تانى بسرعة جدا ....
ف العادى ومن وجهه نظرى الشخصية مبفضلش الدايت دا إن حد يستمر عليه ؛ لأنه هيبقى محتاج تركيز جدا وتبقى فاهم تفاصيله كلها عشان ميبقاش الضرر أكتر من النفع ....
الحاجه التانية جسمك بيدخله كارب بشكل قليل جدا ؛ فهتلاقيك طول الوقت حاسس بخمول ومودك مش حلو .....
لو معندكش أزمة مع الوقت ؛ يبقى الأفضل إنك تمشى على دايت متوازن ؛ بحيث تقدر تكمل عليه ومتتكدرش ؛ يعنى الدايت التقليدى بتبقى حارم نفسك من أكلات معينة ، فمفيش داعى تحرم نفسك أكتر ؛ خصوصا نجاح الدايت معتمد على استمرارك وتقبلك ليه
ملحوظة صغيرة بس مهمة جدا : تقدر توفر احتياجك اليومى من البوتاسيوم من الأكل ؛ وبلاش ناخده من برا غير باستشارة دكتور لو الحالة تستدعى لأن زيادته عن الحد المسموح خطر جدا جدا
