مراجعة حول Huawei Y7a
موبايل جديد من هواوي من الفئة المحبوبة واللي دايمًا بتبيع كتير وهي فئة الـY .. عندك الـY7 Prime 2019 كان عامل مبيعات كتير جدًا، وبعدية الـY7p بالرغم من عدم وجود خدمات جوجل فيه إلا إنه لقى قبول كبير .. النهارده هنراجع Huawei Y7a الجديد اللي بيجي بدون خدمات جوجل ..
التصميم :-
لغة تصميم الموبايل ده اتغيرت خالص .. الموبايل مبقاش شبه الموبايلات الاقتصادية من هواوي .. لا الموبايل بقى شبه موبايلات زي Nova 7 و Nova 7 SE الموبايلات الأغلى في الفئة المتوسطة.
فـ كويس جدًا إننا نشوف تطوير التصميم ده ورصة الكاميرا الخلفية الرباعية في المستطيل الخلفي مع بروز خفيف للكاميرات .. التصميم مواكب جدًا لسنة 2020 .. والبصمة كمان على زرار الباور مش في الظهر.
الشاشة :-
شاشة عملاقة بقياس 6.67 بوصة من نوع IPS LCD بدقة FHD+ مع ثقب كبير شوية للسيلفي في نص الشاشة من فوق .. الحواف حوالين الشاشة مش صغيرة برده .. فتحس كدا إنك ماسك موبايل ضخم في ايدك.
الأداء :-
الموبايل جاي بمعالج كيرن 710A .. وخلي بالك ده مُختلف وإقتصادي شوية عن كيرن 710F .. لإن كيرن 710A بتكنولوجيا 14 نانو والنواتين الأسرع Cortex A73 التردد بتاعهم أقل شوية من الـ710F .. وده بالتبعية إترجم لرقم Antutu أقل حاجة بسيطة .. وأداء فعلي أقل حاجة بسيطة من الكيرن 710F.
مميزات Huawei Y7a :-
خامات محترمة وتقفيل مُتميز
تصميم شيك راقي جدًا
بطارية ضخمة جدًا بتستحمل لوقت طويل
شاحن سريع 22.5 واط
شاشة ضخمة مع شكل الثُقب ودقة عالية وسطوع عالي
عيوب Huawei Y7a :-
صوت واطي مش الأفضل
كاميرات مش الأفضل ومعالجة الصور مش الأفضل
مفيش مثبت إلكتروني في تصوير الفيديوهات الـ 1080p
مفيش جيروسكوب
المعالج متواضع إقتصادي جدًا
خدمات هواوي فقط ومفيش خدمات جوجل