مراجعة تصميم هاتف Samsung Galaxy A51
التصميم :-
موبايل جالاكسي A51 ممتاز جدًا في نقطة الوزن والابعاد والمسكة في الايد وحرفيًا هو الأفضل في نقطة التصميم والمسكة في الايد والوزن الخفيف في الفئة السعرية دي.
الخامات من البلاستيك البولي كاربونيت والشكل نفسه هنلاقي التصميم واخد نقشة عبارة عن 3 مثلثات في ضهر الموبايل اما عن رصة كاميرات الموبايل في الضهر فهي بتيجي بشكل جديد ومميزات طريقة عرض الكاميرات دي في الضهر ان بروزها عن الضهر بيكون قليل جدًا وبيكون للفريم كله مش للكاميرات بس فا مش هيكون في قلق من النقطه دي.
الشاشة :-
الشاشة هي نُقطة القوة الحقيقيه اللي في الموبايل وده لإن الشاشة هي اول شاشة بثقب في الفئة المتوسطة وكمان الشاشة اموليد ومن سامسونج يعني العظمه كلها، شاشة الموبايل بتيجي من نوع سوبر اموليد وبحجم 6.5 بوصة بدقة FHD+ مع ابعاد 20:9 والشاشة كامله لإن السيلفي هنا موجوده في خرم صغير جدًا في نص الشاشة من فوق.
وبالنسبة لطبقة الحماية الموجوده على الموبايل فا هو بيجي عليه Corning Gorilla Glass 3 والموبايل بيخرج من العلبة متركب عليه سكرينه ومن الاعدادات ممكن تلغي شكل الثُقب بتاع الكاميرا السيلفي وهتحط حافة سودا بالعرضه فوق.
الأداء :-
الموبايل بيجي بمعالج اكسينوس 9611 وهو معالج ثماني النواة وبيشتغل بتقنية 10 نانو ميتر
وبإختصار الموبايل بيقدم اداء كويس مش وحش لكنها مش نقطة قوة في الموبايل وعشان تساعد البروسيسور انه يبينلك قوته ويوريك قد ايه هو كويس ادخل اقفل او قلل الانيميشن بتاعت واجهة سامسونج هي حلوه مش وحشه بس بتتقل الواجهة اوي وبتقلل من السرعة الموبايل وعادي ممكن تقللها بس بحيث تاخد نفس التجربة الجميله بتاعتها مع سرعة في الواجهة.