Thread: 
Subscribeمراجعة حول Alcatel 3L – موبايل اقتصادي بتركيبة مواصفات عجيبة !
التصميم :-
الكاتيل بتقول إن تصميم الـ3L بيجي من الزجاج .. بس حقيقي أنا مش شايف ده .. مع التجربة أنا شايف إنه مايل أكتر للبلاستيك .. ممكن يكون عليه طبقة بسيطة من الزجاج .. وطبعًا الفريم من البلاستيك ودي واضحة وصريحه.
والكاميرا الخلفية بارزة عن جسم الموبايل .. والبروز بيتغطى بالكامل بالجراب المُرفق في علبة الموبايل.
الكيرفات اللي في ظهر الموبايل كبيره شوية .. علشان تحسن شوية من مسكة الموبايل في الإيد .. بس هو كده كده مسكته في الإيد حلوة لإن وزنه خفيف .. بيجي بوزن 165 جرام بس.
الشاشة :-
شاشة بحجم 6.22 بوصة من نوع IPS LCD وبتيجي بدقة HD+ .. شاشة إعتيادية جدًا في الفئة السعرية ديه .. مش بتقدم أي عنصر إبهار.
الشاشة واخدة شكل النوتش الـWater Drop .. بس اللي لاحظته .. الحافة السفلية للشاشة كبيرة شوية .. في موبايلات بنفس السعر وأرخص الحافة السفلية أقل من كده .. يا كنتوا تقللوا الحافة يا تكبروا الشاشة !
الشاشة ألوانها الطبيعية مصفره شوية .. ومش هتقدر تعدل درجة ألوان الشاشة لإن ده مش مُتاح في الإعدادات .. بس الإصفرار البسيط ده مش هتلاحظه إلا لو حطيت الموبايل جمب موبايل تاني.
الأداء :-
شركة الكاتيل مستخدمه المعالج التقليدي الميدياتيك Helio P22 بمعمارية تصنيع 12 نانو .. ووجة نظرها إن المعالج ده هيكفي الإستخدام اليومي العادي .. لإن الموبايل ده مش مُخصص للـGamers.
وكمان علشان الكاتيل تحسن من تجربة الـP22 هنا .. فهي مزودة الموبايل بـ4 جيجا رام .. والسوفت وير كمان هنا خفيف .. شكله تقليدي مفهوش إنبهارات بس المهم إنه خفيف.
البطارية :-
بطارية عادية بتيجي بسعة 4000 مللي أمبير بتستحمل معاك حوالي 6 ساعات وشوية شاشة مفتوحة .. وقت مقبول بس مش الأفضل.
بس للأسف منفذ الشحن Micro USB 2.0 .. ومش هعتبره عيب لإن معظم الموبايلات بنفس المنفذ ده إلا موبايلين تلاته فلته كدا .. والشاحن المُرفق 10 واط بيشحن البطارية في حوالي ساعتين ونص.
الكاميرا :-
الكاتيل ضايفه هنا 3 كاميرات حقيقة في الظهر ليهم وظائف مش مجرد أرقام وخلاص .. الأساسية 48 ميجا بيكسل بفتحة عدسة F/1.8 .. والتانية 5 ميجا بيكسل مع فتحة عدسة F/2.4 للتصوير الواسع .. والتالتة 2 ميجا بيكسل للتصوير الماكرو بفتحة عدسة F/2.4.
والسيلفي بيجي بدقة 8 ميجا بيكسل مع فتحة عدسة F/2.0 وهو موجود في نوتش الشاشة.
سعر الموبايل :-
سعر موبايل Alcatel 3L النسخة الوحيدة المتوفرة منه بمساحة تخزين 64 جيجا مع 4 جيجا رام بتيجي بسعر 2399 جنية.
اتمنى ان اكون قد افدتكم جميعا..................
