Thread: 
Subscribeمراجعة حول Huawei Nova 7 5G – وحش هواوي الجديد في الفئة المتوسطة !
التصميم :-
موبايل Huawei Nova 7 تصميمه بيجي من الزجاج مع فريم معدني .. مفيش غلطة ممكن أطلعها في التصميم .. مُناسب جدًا وشيك جدًا.
الموبايل واخد نفس النقشة وشكل الظهر بتاع الـNova 5T .. ولكن مع تحسن في شكل الكاميرات .. اللي بقت في نافذة مُستطيلة علشان تواكب تريندات 2020.
الشاشة :-
وأخيرًا شاشة أموليد من هواوي في الفئة المتوسطة .. الـNova 7 جاي بشاشة بحجم 6.53 بوصة من نوع اوليد بدقة FHD+.
والشاشة واخد تريند الثقب بتاع السيلفي اللي على الشمال .. والثقب اللي هنا حجمه صغير مش كبير ومش هيضايقك .. ومفيش أي ظل حواليه لإن الشاشة هنا AMOLED.
الحواف حوالين الشاشة مقبولة .. ولكني كنت أتمنى حافة سفلية أصغر من كدا .. بس هي برده مقبولة، مش ميزة ومش عيب.
الأداء :-
معالج جديد رائد من هواوي داعم لشبكات الجيل الخامس وهو الكيرن 985 بتكنولوجيا 7 نانو .. نوع الذاكرة الداخلية UFS 2.1 وهي المُتعارف عليها في الفئة المتوسطة.
المعالج ده تقريبًا مُكافيء لنفس الاداء بتاع الـKirin 980 ومفيش فرق محسوس بينهم .. واللي هو اصلًا كان أدائه مُمتاز بصراحة .. والسخونية في Kirin 985 أقل بفرق واضح عن Kirin 980 اللي كان بيسخن بسهولة مع الضغط على الموبايل، وفوق ده دعم لشبكات الجيل الخامس.
البطارية :-
بطارية عادية تقليدية بسعة 4000 مللي أمبير .. في 2020 بقت صغيرة .. ولكن حجمها الصغير ده مخلي الموبايل خفيف شوية .. هي نسبة وتناسب.
عمومًا البطارية هتديلك متوسط إستخدام من 6 لـ7 ساعات شاشة مفتوحة وهتكمل اليوم بإستخدام مُتوسط مش عنيف.
الكاميرات :-
الموبايل بيجي بـ4 كاميرات خلفية .. الأساسية 64 ميجا بيكسل بفتحة عدسة F/1.8 بمستشعر*سوني*IMX686 .. والعدسة التانية 8 ميجا بيكسل بفتحة عدسة F/2.4 للزوم الحقيقي 3X وبيوصل Digital لحد 20X .. والعدسة التالتة 8 ميجا بيكسل للتصوير الواسع فتحة عدسة F/2.4 .. والأخيرة 2 ميجا بيكسل للتصوير الماكرو بفتحة عدسة F/2.4.
والسيلفي الموجود في ثقب الشاشة بيجي بدقة 32 ميجا بيكسل مع فتحة عدسة F/2.2.
سعر الموبايل :-
السعر الرسمي 8390 جنية للنسخة 256 جيجا مع 8 جيجا رام .
اتمنى ان اكون قد افدتكم جميعا..................
