مراجعة حول Samsung Galaxy A21s – أقوى كاميرا و بطارية بـ 3000 جنية !
التصميم :-
موبايل Galaxy A21s. مش بيقدم أي تجديد من ناحية التصميم .. نفس تصميم مُعظم فئة Galaxy-A من سامسونج .. الخامات بالكامل من البولي كربونيت .. الظهر لامع شوية وبيعمل إنعكاسات بألوان مُختلفة مع تغير درجة الإضاءة.
ونافذة الكاميرات مُستطيلة وفيها العدسات مترتبة على حرف L .. وعمومًا شكل التصميم كويس مش وحش .. ومش قديم وأعتقد شكله هيفضل مواكب معانا في 2020 .. وممكن على السنة الجاية سامسونج تفكر تغير التصميم ده.
الشاشة :-
وبصراحة شاشة الموبايل كنت مقفول منها من المواصفات ولكن بعد ما جربتها رأيي إختلف ..*الشاشة هنا بحجم 6.5 بوصة من نوع TFT بدقة HD+ فقط .. والشاشة واخده تريند الثقب بتاع السيلفي على الشمال.
الشاشة هنا مش وحشة خالص على إنها بجودة TFT .. يعني الألوان اللي هتشوفها من الشاشة ديه ودرجات السطوع بتاعتها كويسة ومناسبة للفئة السعرية اللي الموبايل ده محطوط فيها.
الأداء :-
معالج جديد من سامسونج .. كنت متحمس اني اجربه .. وهو الـExynos 850 .. بتكنولوجيا تصنيع 8 نانو لأول مرة في فئة الـ3 الاف جنية.
المعالج ده بقى غريب .. رقمه في إختيار Antutu سيء .. لو هناخد بالرقم فهو يعتبر كدا من أضعف المعالجات حاليًا في فئته السعريه .. أضعف من الـG85, G80, G70 وأضعف من Kirin 710 وSnapdragon 665.
البطارية :-
بطارية ضخمة 5000 مللي أمبير .. موجودة في موبايلات ريلمي وشاومي .. بس البطارية هنا أداءها أفضل بفرق ملحوظ عن ريلمي وشاومي بسبب المعالج المُوفر جدًا .. حرفيًا انا مكنتش عارفه أخلصها .. أعتقد هتكمل يومين واكتر مستريح.
الشاحن المرفق 15 واط .. بيشحن البطارية الضخمة ديه في ساعتين .. وانا راضي جدًا عن سرعة الشحن ديه ومبسوط جدًا بالبطارية القوية اللي هنا.
الكاميرات :-
الموبايل جاي بـ4 كاميرات في الظهر .. الأساسية 48 ميجا بيكسل بفتحة عدسة F/2.0 والتانية 8 ميجا بيكسل للتصوير الواسع بفتحة عدسة F/2.2 والتالتة 2 ميجا بيكسل للماكرو بفتحة عدسة F/2.4 والاخيرة 2 ميجا بيكسل للعزل.
والسيلفي الموجود في ثقب الشاشة بيجي بدقة 13 ميجا بيكسل مع فتحة عدسة F/2.2.
سعر الموبايل :-
سعر الموبايل حوالي 3100 جنية للنسخة 64 جيجا مع 4 جيجا رام وبينفع تركب كارت ميموري بحجم 512 جيجا وشريحتين إتصال مع بعض في نفس الوقت.
اتمنى ان اكون قد افدتكم جميعا..................