تيجى نعرف يعنى ايه..دعم ومقاومه؟؟

[ayman.shosha]

بعد بسم الله الرحمن الرحيم عاوز اصبح على كل اعضاء فوركس العرب واحد واحد من اول مديرنا الكبير لحد العضو اللى لسه مسجل معانا النهارده .. واقول لكم ربنا يديم الاخوه والخير بيننا ويرزقنا يارب العلم النافع اللى نقدر من خلاله نساعد بعض اما بعد،،

النهارده عاوز بعد اذنكم اتكلم مع اخوانى المبتدئين عن موضوع هام جدا جدا وهو "الدعم والمقاومه"
ايوه يا سيدى الدعم والمقاومه

مش الدعم ده اللى هو الدعم الفنى يعنى xxx..
والمقاومه دى اللى كانت فى حصة العلوم xxx..!!

صباح الفل..
اشرب فنجان الشاى وصحصح بقى مع اخوك الغلبان ايمن شوشه
وخلينا نقول الكلمتين وبلاش هزار
ونبدأ على بركة الله..

اولا: مناطق الدعم
مناطق الدعم هى مناطق تكون اسفل القيعان السعريه والتى يرتفع السعر عند الوصول اليها او هى مناطق تدفع الاسعار الى الارتفاع..وتعتبر تلك المناطق هى اماكن جيده لصفقات الشراء..
سهله ولا اوضح كمان؟؟
اوضح كمان!!
بص بقى..
لو انت ربنا وفقك فى تحديد مناطق الدعم دى هتكون امامك فرص جيده للدخول الى صفقات الشراء
فتخيل لما تكون اخترت قاع محترم تدخل من خلاله لصفقة شراء ويكون كمان القاع ده موجود فى منطقة دعم
وقتها يبقى انت اخترت مكان درجة الامان فيه عاليه وصفقتك ان شاء الله ستحقق الربح

طيب احدد ازاى مناطق الدعم دى؟؟
شوف..كل المطلوب منك ان اكثر من قاع سعرى يختار نفس المكان وبالتالى يمكنك وصلهم بواسطة خط
هذا الخط هو خط الدعم وبالتالى وقتما تجد السعر يهبط الى هذا الخط اللى حضرتك رسمته المفروض بعدها ان السعر يعاود الارتفاع مره اخرى ولا فيها اى صعوبه
شوف الصوره دى وانت تفهم اكتر..

بس المهم عينك تكون حساسه مع الشارت لأن خطوط الدعم بتتغير مع الوقت
مش هنفضل يعنى اسبوع شغالين على نفس خط الدعم .. افتكر السوق مرن وغير ثابت "مالوش امان"
يعنى عينك دايما على الشارت كل ما تظهر مناطق جديده امسح القديم واشتغل على الجديد..

---------------------------------------------------------------
----------------------------------------------------------------
-----------------------------------------------------------------


ثانيا: مناطق المقاومه
مناطق المقاومه هى مناطق تكون اعلى القمم السعريه والتى ينخفض السعر عند الوصول اليها او هى مناطق تدفع الاسعار الى الانخفاض..وتعتبر تلك المناطق هى اماكن جيده لصفقات البيع..
نوضح كمان!!
شوف يا سيدى..
لو انت ربنا سهلها معاك فى تحديد مناطق المقاومه دى هتكون امامك فرص جيده للدخول الى صفقات البيع
فتخيل لما تكون اخترت قمه سعر تدخل من خلالها لصفقة بيع وتكون كمان القمه دى موجوده فى منطقة مقاومه..وقتها يبقى انت اخترت مكان درجة الامان فيه عاليه وصفقتك ان شاء الله ستحقق الربح

ازاى احدد مناطق المقاومه؟؟
شوف..كل المطلوب منك ان اكثر من قمه سعريه تختار نفس المكان وبالتالى يمكنك وصلهم بواسطة خط
هذا الخط هو خط المقاومه وبالتالى وقتما تجد السعر يصعد الى هذا الخط اللى حضرتك رسمته المفروض بعدها ان السعر يعاود الانخفاض مره اخرى يعنى فرصة البيع اصبحت موجوده امامك ولا ايه!!
تعالى كده نشوف صوره..

خطوط المقاومه كمان عاوزه عين حساسه عشان بتتغير كل فتره وعاوزه مراقبه مستمره
وهفكرك تانى .. السوق مرن وغير ثابت "مالوش امان"

نكمل كلام..
كلام ايه انت مش كده خلاص وعرفنا ايه هو الدعم والمقاومه وفهمنا انهم عكس بعض وانهم مناطق غير ثابته وبتتغير مع الوقت..!!
ايوه صح
وعشان مناطق الدعم والمقاومه بتتغير مع الوقت
فى حاجه كمان بتحصل ان "الدعم ممكن يتغير الى مقاومه" مع الوقت او "المقاومه تتغير الى دعم"
إيه..؟؟!!
شوفت بقى وكنت عاوزنى اخلص الموضوع مع ان ده اهم جزء فى الموضوع وسبب شرح معنى الدعم والمقاومه هو الوصول الى هذا الجزء..

كتير مننا بيعتقد ان خط الدعم او المقاومه عمره طويل وممكن يظل يستمر فى دخول الصفقات اعتمادا عليه
الا ان ذلك لا يحدث وهو ما يسبب خبيه الامل للبعض منا ممن هم قليلى الخبره بالسوق
فالاسعار دائما ماتختبر مستويات متعدده من المقاومات والدعوم
هذه المستويات غالبا تأتى من خلال تغير العرض والطلب على الاسعار
فكلما زاد الطلب عن العرض كلما ارتفعت الاسعار واختبرت مستويات مختلفه من الدعم والمقاومه
وكلما قل الطلب عن العرض كلما انخفضت الاسعار واختبرت ايضا مستويات مختلفه من الدعم والمقاومه
شوف حضرتك اختبار مستويات الدعم مثلا فى الصوره دى..

كما انه فى الكثير من الاحوال يتحول - الدعم الى مقاومه - اى من خط يدفع الاسعار الى الارتفاع الى خط يدفع الاسعار الى الهبوط ..
بس خلى بالك التحول من الدعم الى المقاومه لا يتأكد لمجرد ان السعر كسر الدعم
ولكن يجب ان تتأكد تلك المقاومه من تكرارالقمم السعريه عليها ..
زى ما حضرتك شايف فى الصوره دى..

والعكس بالنسبه لتحول - المقاومه الىدعم - من خط يدفع الاسعار الى الهبوط الى خط يدفع الاسعار الى الارتفاع
ايضا لا يتأكد هذا التحول الا من خلال تاكيده بتكرار القيعان على خط الدعم..
زى ما حضرتك شايف فى الصوره دى..

وهكذا نكون انتهينا من هذا التوضيح الموجز
تحياتى لكم وكل الامنيات بالتوفيق
واتمنى من الله ان اكن وفقت
..ولا اخجل عندما اقول صححوا لى يا اهل الخبره..

[ezz]

السلام عليكم ورحمة اللة وبركاتة
يعنى الدعم هو الى بيرفع السعر لاعلى
والمقاومة هى الى بتخلى السعر ينخفض
شكرا لك اخى الكريم

[ayman.shosha]

السلام عليكم ورحمة اللة وبركاتة
يعنى الدعم هو الى بيرفع السعر لاعلى
والمقاومة هى الى بتخلى السعر ينخفض
شكرا لك اخى الكريم

عليك نور ياغالى
ربنا يفتحها عليك
بس زى ما قلنا المناطق دى غير مستديمه
بمعنى انها تتغير دائما على حسب العرض والطلب بالسوق
عشان كده لازم تكون حذر ومتابع اثناء التعامل من خلالها..

[sendrela]

والله فعلا شرح ولا اروع سهل ومبسط للجميع حتى المبتدئين من امثالى هههههههه...فعلا مميز يسلمووو

وبأنتظار مواضيعك المدهشه

دمت بود

[payza]

المقاومة والدعم هي من الاساسيات الهامة لمتداول الفوركس
لكن كيف احدد الدعم والمقاومة اوقات التذبذب

[ayman.shosha]

المقاومة والدعم هي من الاساسيات الهامة لمتداول الفوركس
لكن كيف احدد الدعم والمقاومة اوقات التذبذب

شوف ياغالى :-
دائما اوقات التذبذب ما تكسر قواعد السوق
فقوى العرض والطلب تكن مستفزه وغير مستقره على نسق عام
وهذا هو السبب للتحذير من الابتعاد عن السوق اوقات التذبذب بالنسبه للصفقات قصيرة المدى
الا ان هذا الوقت لا يناسب سوى نوع واحد من الصفقات وهى الاسكالبيج التى تعتمد بالاساس على
الارتفاع اللحظى للأسعار من اجل اقتناص النقاط مهما كانت قيمتها قليله المهم الحصول على الربح من هذا الصراع

ومن خلال هذه الحالة الغير مستقره للسوق
يصعب الوصول الى رؤيه محدده لمناطق الدعم والمقاومه
كما ان معدل تغير تلك المناطق سيكن سريع بدرجه تجعل منه اداه لا يعتمد عليها فى هذا الوقت
ولو اننا احيانا نستعيض عن هذا الاسلوب فى تلك الاوقات من خلال التعامل بأسلوب الهاى واللو للوصول الى فكر ورؤيه اعم واشمل لحركة السوق..

[moh133]

الله يفتح علييك واللهِ
أنا كنت عارف المعني دي بس بجد
ل أي حد مبتدئ أول مرة أشوف شرح بالسهولة دي

[ayman.shosha]

الله يفتح علييك واللهِ
أنا كنت عارف المعني دي بس بجد
ل أي حد مبتدئ أول مرة أشوف شرح بالسهولة دي

تحت امرك ياغالى
واشكرك على تشجيعك لى
واتمنى من الله ان تظل صورتى حسنه امام جميع اخوانى بالمنتدى..

[mekawypair]

السلام عليكم ورحمة الله وبركاتة
هذا موضوع هام جدا ومشكور المجهود
وجزاكم الله خيرا

[ayman.shosha]

السلام عليكم ورحمة الله وبركاتة
هذا موضوع هام جدا ومشكور المجهود
وجزاكم الله خيرا

اللى يهمنى ان الفكره على الاقل
تكون وصلت لحضرتك
عشان تقدر تكمل المشوار صح..